विकीचे हात सुन्न पडले, शूट दीड महिना थांबवलं…; ‘तो’ सीन शूट करताना नेमकं काय घडलं? ‘छावा’चे दिग्दर्शक म्हणाले…

महाराजांच्या अंतिम काळात औरंगजेबाने त्यांचा खूप छळ केला होता. हे दृश्य शूट करताना विकीच्या हाताला खरोखरच दुखापत झाली होती. याबद्दल सांगताना लक्ष्मण उतेकर म्हणतात, “संपूर्ण रात्र, विकीचे हात साखळदंडाने बांधलेले होते आणि जेव्हा आम्ही दोरी काढली तेव्हा त्याचे हात खालीच येत नव्हते. त्याचे हात सुन्न पडले होते. यानंतर आम्हाला शूटिंगसाठी दीड महिन्यांचा ब्रेक घ्यावा लागला होता.”

लक्ष्मण उतेकर पुढे म्हणाले, “आम्ही क्लायमॅक्सच्या सीनसाठी संपूर्ण सेट बनवलेला तो काढून बरखास्त केला. विकीला बरं होण्यासाठी साधारण दीड महिन्यांचा कालावधी दिला. मग, पुन्हा सेट बांधला आणि नंतर पुन्हा एकदा शूट सुरू झालं.”

“ज्यावेळी आम्ही नव्याने शूटिंगला सुरुवात केली तेव्हा ऐतिहासिक नोंदीनुसार तो दिवस सारखाच होता. म्हणजेच, औरंगजेबाने छत्रपती संभाजी महाराजांचा छळ केला तो दिवस आणि शूटिंगची तारीख हे दिवस सारखेच होते. योगायोगाने त्याच दिवशी आम्ही चित्रीकरण करत होतो. त्यामुळे त्या दिवशी मनात अनेक भावना दाटून आल्या होत्या.” असं लक्ष्मण उतेकरांनी सांगितलं.

दरम्यान, बहुप्रतीक्षित ‘छावा’ चित्रपट येत्या १४ फेब्रुवारीला प्रेक्षकांच्या भेटीला येणार आहे. यामध्ये अभिनेता विकी कौशल छत्रपती संभाजी महाराजांची भूमिका साकारणार आहे. तर दाक्षिणात्य अभिनेत्री रश्मिका मंदाना प्रेक्षकांना महाराणी येसूबाईंच्या भूमिकेत झळकणार आहे. औरंगजेबाची भूमिका अभिनेता अक्षय खन्ना ‘छावा’मध्ये साकारणार आहे. याशिवाय आशुतोष राणा, दिव्या दत्ता, डायना पेन्टी, प्रदीप राम सिंह रावत, विनीत कुमार सिंह, संतोष जुवेकर, आशिष पाथोडे, किरण करमरकर हे कलाकार देखील ‘छावा’मध्ये महत्त्वाच्या भूमिकेत आहेत.