२२ जानेवारी २०२४ रोजी रामलल्ला अयोध्येत विराजमान झाले अन् साऱ्या जगभरात याची दखल घेतली गेली. मोठमोठ्या राजकीय नेत्यांपासून अनेक बॉलिवूड सेलिब्रिटीजनी या सोहळ्याला हजेरी लावली. अमिताभ बच्चन, अभिषेक बच्चन, अनुपम खेर, रजनीकांत, कतरिना कैफ, विकी कौशल, रणबीर कपूर, आलिया भट्ट, राम चरण, चिरंजीवी, रोहित शेट्टी अशा कित्येक सेलिब्रिटीजनी या सोहळ्याला हजेरी लावली. अयोध्येमध्ये उपस्थित असलेल्या या सेलिब्रिटीजचे बरेच फोटोज सोशल मीडियावर व्हायरल झाले. आता याच काही सेलिब्रिटीजना आणि एकूणच बॉलिवूडला कॉमेडीयन राजीव निगम यांनी एक व्हिडीओ शेअर करत ट्रोल केलं आहे. एक जुना व्हिडीओ राजीव यांनी शेअर केला आहे. या व्हिडीओमध्ये बरेच कलाकार हे जात आणि धर्मापलीकडे विचार करून आपण भारतीय आहोत हा संदेश देतान दिसत आहेत. सोशल मीडियावर हा व्हिडीओ चांगलाच व्हायरल होत आहे. आणखी वाचा : आयुष्मान खुरानाचा 'दिल दिल पाकिस्तान' गाणं गातानाचा व्हिडीओ व्हायरल, नेमकं सत्य काय? जाणून घ्या जात-पात, धर्म यावरुन लोकांमध्ये द्वेष पसरवण्याबाबतीत जगजागृतीसाठी ही जाहिरात तयार करण्यात आली होती. आमिर खान, सचिन तेंडुलकर, अमिताभ बच्चन, आशुतोष गोवारीकरसारखे बरेच मोठे कलाकार या व्हिडीओमध्ये आपल्याला पाहायला मिळतील. व्हिडीओच्या सुरुवातीला आमिर खान दिसत आहे. आमिर म्हणतो, "धर्माच्या नावावर बरेच लोक गुन्हे करतात. कोणताही देव किंवा खुदा हे गुन्हे माफ करेल का?"यानंतर सचिन तेंडुलकर म्हणतो, "जेव्हा तुम्ही मैदानावर असता तेव्हा तुम्ही हिंदू आहात की मुस्लिम याच्याशी देणं घेणं नसतं. मी सचिन तेंडुलकर आहे आणि सर्वप्रथम मी भारतीय आहे." यानंतर अमिताभ बच्चन, अनुपम खेर, शबाना आजमी, झाकीर खान, तब्बू असे कित्येक कलाकार आम्ही पहिले भारतीय आहोत असा संदेश देताना दिसतात. हा व्हिडीओ शेअर करत राजीव निगम यांनी बॉलिवूड कलाकारांवर निशाणा साधला आहे. आपल्या ट्वीटमध्ये राजीव निगम लिहितात, "हा पहा जुना व्हिडीओ, तेव्हा देशात किती द्वेषभावना होती की सचिन आणि बच्चनजी यांना समोर येऊन संदेश द्यावा लागायचा. आता ही मंडळी असा संदेश देताना दिसतात का? याचा अर्थ एकदम स्पष्ट आहे की आता देशात शांती आहे कारण रामराज्याची स्थापना झालेली आहे. आता सेलिब्रिटीजना समोर यायची काहीच गरज नाही. जय श्री राम."
