बॉलिवूडच्या किंग खान शाहरुख खानने त्याच्या ‘पठाण’ या चित्रपटातून बॉक्स ऑफिसवर धुमाकूळ घातला. बॉक्स ऑफिसवर कमाल दाखवत याने वेगवेगळे रेकॉर्ड मोडीत काढले आहेत. शाहरुखच्या चाहत्यांनी आणि एकूणच चित्रपट रसिकांनी या चित्रपटाला डोक्यावर घेतलं. प्रदर्शनाआधी हा चित्रपट वेगवेगळ्या कारणांमुळे वादाच्या भोवऱ्यात अडकला, पण त्यामुळे चित्रपटाचं फारसं नुकसान झालं नाही.
चित्रपटात शाहरुख खान आणि दीपिका पदूकोणची केमिस्ट्री लोकांना चांगलीच पसंत पडली. दीपिकावर चित्रित झालेल्या ‘बेशरम रंग’ या गाण्यामुळे चांगलाच वाद निर्माण झाला होता, पण यातील या दोघांची केमिस्ट्री लोकांना भावली. आता पुन्हा हीच जादू मोठ्या पडद्यावर अनुभवायला मिळणार आहे. लवकरच शाहरुख खान आणि दीपिका पदूकोण पुन्हा एका अशाच गाण्यावर थिरकताना दिसणार आहेत.
आणखी वाचा : ‘पठाण’चं कलेक्शन १००० कोटींहून अधिक; YRF आणि शाहरुख खान यांच्या हाती लागले ‘इतके’ कोटी, जाणून घ्या
‘ईटाइम्स’च्या वृत्तानुसार शाहरुख खानच्या आगामी ‘जवान’ चित्रपटात दीपिका पदूकोणचाही एक कॅमिओ पाहायला मिळणार आहे. नुकतंच दीपिका आणि शाहरुखने यातील एका गाण्यासाठी चित्रीकरण केलं आहे, त्यादरम्यानचे काही फोटो सोशल मीडियावर व्हायरल झाले आहेत. दोघांनी पांढरा शर्ट, काळी पॅन्ट आणि मॅचिंग शूज परिधान केले आहेत.
सोशल मीडियावर हे फोटो चांगलेच व्हायरल होत आहेत. शाहरुख खानच्या ‘जवान’ चित्रपटाच्या सेटवरचे बरेच फोटो बाहेर येत आहेत. मध्यंतरी फराह खानबरोबरही एका गाण्याच्या चित्रीकरणाचे फोटो समोर आले होते. अॅटली दिग्दर्शित ‘जवान’ जूनमध्ये प्रदर्शित होणार असल्याची शक्यता वर्तवली जात आहे. यामध्ये शाहरुख खानबरोबरच विजय सेतुपती, नयनतारा, सुनील ग्रोव्हर हे कलाकार महत्त्वाच्या भूमिकेत दिसणार आहेत. शाहरुखचे चाहते या चित्रपटाची आतुरतेने वाट बघत आहेत.
