Amy Jackson blessed with baby boy : ‘सिंग इज ब्लिंग’ फेम लोकप्रिय बॉलीवूड अभिनेत्री अ‍ॅमी जॅक्सनने चाहत्यांबरोबर आनंदाची बातमी शेअर केली आहे. सात महिन्यांपूर्वी ब्रिटिश अभिनेता आणि संगीतकार एडवर्ड जॅक पीटर वेस्टविकशी लग्न करणारी अ‍ॅमी जॅक्सन आई झाली आहे. ३२ वर्षीय अ‍ॅमीने तिच्या दुसऱ्या बाळाला जन्म दिला आहे. अ‍ॅमीने (Amy Jackson blessed with baby boy) तिचा पती व जन्मलेल्या बाळाबरोबरचे फोटो शेअर केले आहेत.
अ‍ॅमी व एडवर्ड वेस्टविक यांनी जानेवारी २०२४ मध्ये एंगेजमेंट केली होती. त्यानंतर आठ महिन्यांनी अ‍ॅमी व एडवर्ड यांनी २७ ऑगस्ट २०२४ रोजी इटलीतील अमाल्फी बीचवर डेस्टिनेशन वेडिंग केलं होतं. दोघांनी ख्रिश्चन पद्धतीनुसार लग्न केलं होतं. या लग्नात अ‍ॅमीचा पाच वर्षांचा मुलगा अँड्रियासही देखील सहभागी झाला होता. लग्नानंतर दोन महिन्यांनी अ‍ॅमीने ती आई होणार असल्याची माहिती दिली होती. आता तिने मुलाला जन्म दिला आहे.
अ‍ॅमी जॅक्सनला दुसरा मुलगा झाला आहे. अ‍ॅमीने इन्स्टाग्रामवर तीन फोटो शेअर केले आहेत. पहिल्या फोटोत अ‍ॅमीने बाळाला पकडलंय, तर तिचा पती एडवर्ड तिला किस करताना दिसतोय. दुसऱ्या फोटोत त्यांच्या बाळाचा हात दिसत आहे. तिसऱ्या फोटोत अ‍ॅमीने बाळाला जवळ घेतलेलं दिसत आहे. अ‍ॅमीने बाळाचे फोटो शेअर करत त्याचे नावही जाहीर केले आहे.
‘या जगात तुझे स्वागत आहे, बेबी बॉय.
ऑस्कर अलेक्झांडर वेस्टविक’, असं कॅप्शन अ‍ॅमीने फोटोंना दिलं आहे. अ‍ॅमीच्या या पोस्टवर तिचे चाहते तसेच मित्र-मैत्रिणी कमेंट्स करून तिला शुभेच्छा देत आहेत.
अ‍ॅमी व एडवर्ड तीन वर्षांपासून एकत्र आहेत. ते २०२२ मध्ये डेट करू लागले आणि २०२४ मध्ये त्यांनी लग्न केलं. त्यापूर्वी अ‍ॅमी एकटीच तिच्या पहिल्या नात्यापासून असलेल्या मुलाचा सांभाळ करत होती. अ‍ॅमी एडवर्ड वेस्टविकशी लग्न करण्यापूर्वी बिझनेसमन जॉर्ज पानायियोटोबरोबर रिलेशनशिपमध्ये होती. दोघांचा साखरपुडा जानेवारी २०१९ मध्ये झाला होता. लग्न होण्याआधीच अ‍ॅमीने मुलाला जन्म दिला. अँड्रियास जॅक मुलाचं नाव ठेवलं. मात्र मुलाच्या जन्मानंतर अ‍ॅमी व जॉर्जचा साखरपुडा मोडला. जॉर्ज व अ‍ॅमी यांच्यात सतत मतभेद व्हायचे, त्यामुळे दोघांचे लग्न होण्याआधीच ब्रेकअप झाले. त्यानंतर अ‍ॅमी एडवर्डच्या प्रेमात पडली. दोघांनी लग्न केलं आणि आता ते एका मुलाचे आई-बाबा झाले आहेत.
अ‍ॅमीचे चित्रपट
अ‍ॅमी जॅक्सनचा मोठा चाहतावर्ग आहे. तिने अनेक बॉलीवूड व दाक्षिणात्य चित्रपट केले आहेत. ‘एक दिवाना था’ या चित्रपटातून बॉलीवूड पदार्पण करणाऱ्या अ‍ॅमीने ‘येवाडू’, ‘ऑपरेशन फॉर्च्युन’, ‘थेरी’, ‘थंगमगन’, ‘मद्रासापट्टणम’, ‘देवी’, ‘गेथू’ या चित्रपटांसाठी ओळखली जाते.