आपल्या देशात बरेच घोटाळे होतात त्यापैकी फार कमी घोटाळे उघडकीस येतात. असाच एक मोठा क्रेडिट कार्ड घोटाळा नुकताच उघडकीस आला आहे. या घोटाळ्यात बऱ्याच बॉलिवूड सेलिब्रिटीज तसेच क्रिकेटर्सची नावंदेखील समोर आली आहेत. सेलिब्रिटीजच्या जीएसटी नंबरच्या सहाय्याने त्यांचे पॅन कार्ड डिटेल्स काढून त्यांच्या नावाने क्रेडिट कार्ड फ्रॉड केल्याचं प्रकरण नुकतंच उघडकीस आलं आहे.
या सेलिब्रिटीजच्या नावावर फीनटेक कंपनी ‘वन कार्ड’ या कंपनीची क्रेडिट कार्ड मागवण्यात आली होती. कंपनीला याबद्दल माहिती मिळाली तोपर्यंत या वेगवेगळ्या कार्डच्या माध्यमातून २१.३२ लाखांची खरेदी करण्यात या लोकांना यश मिळालं. ही माहिती समोर येताच कंपनीने ताबडतोब दिल्ली पोलिसात तक्रार केली आणि चौकशी केल्यानंतर पोलीसांना ५ लोकांना अटक करण्यात यश मिळालं आहे.
आणखी वाचा : सध्याच्या तरुण पिढीबद्दल कंगना रणौतच परखड मत; म्हणाली “यांचं ब्रेन वॉश करणं…”
या प्रकरणात अभिषेक बच्चन, शिल्पा शेट्टी, माधुरी दीक्षित, अलिया भट्ट, सचिन तेंडुलकर, महेंद्रसिंह धोनीसारख्या बड्या लोकांची नावं समोर आली आहेत. यांच्या नावावर फेक आयडी प्रूफ तयार करून हा सगळा घोटाळा करण्यास आल्याचं स्पष्ट झालं आहे. शाहदरा परिसराचे डेप्युटी पोलीस कमिशनर रोहित मीना यांनी याबद्दल माहिती दिली. ते म्हणाले, “सध्या या प्रकरणाची पोलिस चौकशी करत आहे त्यामुळे याबद्दल जास्त माहिती देणं आत्ता शक्य नाही.” पाचही आरोपींची नावं दिल्ली पोलीसांनी जाहीर केली आहेत.
क्रेडिट कार्ड कंपनीने पोलीसांना दिलेल्या माहितीत सांगितलं की ही एक पुणे स्थित फीनटेक कंपनी आहे जी ‘वन कार्ड’ नावाने क्रेडिट कार्ड पुरवते, खरंतर हे एक मेटल कार्ड आहे. या आरोपींना या घोटाळ्यातून तब्बल १० लाखांचं क्रेडिट लिमिटसुद्धा मिळालं होतं. हा एकूणच प्रकार आता उघडकीस आल्याने चांगलीच खळबळ माजलेली आहे.
