रितेश देशमुख व जिनिलीया देशमुख यांच्याकडे चित्रपटसृष्टीमधील आदर्श जोडपं म्हणून पाहिलं जातं. या दोघांमधील खऱ्या आयुष्यातील केमिस्ट्री कमालीची आहे. २०१२मध्ये रितेश व जिनिलीया विवाहबंधनात अडकले. या दोघांचं लग्न अगदी थाटामाटात पार पडलं. रितेश व जिनिलीयाच्या लग्नाला आता ११ वर्षे पूर्ण झाली आहे. दोघांचं एकमेकांवर किती प्रेम आहे हे प्रत्येक व्हिडीओ व फोटोंमधून दिसून येतं.
‘तुझे मेरी कसम’ हा या दोघांचा पहिला एकत्रित चित्रपट. या चित्रपटानिमित्ताने रितेश व जिनिलीया यांना एकमेकांना ओळखण्याची संधी मिळाली. काही वर्षे एकमेकाला डेट केल्यानंतर दोघांनी लग्न करण्याचा निर्णय घेतला. पण लग्नापूर्वी या दोघांच्या नात्याला कुटुंबीयांचा विरोध होता असं बोललं जात होतं.
पण खरंच या दोघांच्या नात्याला कुटुंबीयांचा विरोध होता का? याबाबत रितेशने खुलासा केला आहे. ‘मुंबई तक’ला दिलेल्या मुलाखतीमध्ये रितेशला त्याच्या खासगी आयुष्याबाबत प्रश्न विचारण्यात आला. “जिनिलीया व तुझ्या नात्याला कुटुंबियांचा विरोध होता हे खरं आहे का?” असं रितेशला विचारण्यात आलं.
आणखी वाचा – नाशिकची भावी आमदार, खासदार होण्यास सायली संजीव तयार? राजकारणाबद्दल म्हणाली, “मला…”
यावर रितेश म्हणाला, “अजिबात नव्हता. आपल्याला आयुष्यामध्ये काय करायचं आहे, आपली गाडी रुळावर आहे की नाही हे मलाच काही वर्ष माहीत नव्हतं. आमच्या नात्याला कुटुंबीयांचा विरोध कधीच नव्हता. आम्ही वर्षा बंगल्यावर जेव्हा राहत होतो तेव्हा जिनिलीया तिथेही येत होती. वर्षानंतर वरळीला आम्ही राहायला गेलो. तिथे जिनिलीया यायची”. जिनिलीया तर विलासराव देशमुख यांच्याही खूप जवळ होती. याबाबत तिने स्वतः बऱ्याच मुलाखतींमध्ये भाष्य केलं आहे.
