विकी कौशल हा बॉलिवूडमधील लोकप्रिय अभिनेत्यांपैकी एक आहे. नुकतंच विकी कौशलने ठाण्यात एका कार्यक्रमात हजेरी लावली होती. विकीला पाहण्यासाठी चाहत्यांनी गर्दी केली होती. या कार्यक्रमात विकी कौशलला एका चाहतीने थेट प्रपोज केलं.
‘विरल भय्यानी’ या इन्स्टाग्राम पेजवरुन या कार्यक्रमातील एक व्हिडीओ शेअर केला आहे. या व्हिडीओमध्ये एक चाहती विकी कौशलप्रती असलेलं तिचं प्रेम व्यक्त करताना दिसत आहे. “कतरिना कैफ विकी कौशलची जान आहे. पण विकी कौशल माझी जान आहे. या जन्मात कतरिना यांची झाली. पण या पुढील सगळ्या जन्मी विकी कौशल फक्त माझा असेल,” असं चाहती विकी कौशलला म्हणत आहे.
चाहतीचं हे प्रेम पाहून विकी कौशलही भारावून गेल्याचं व्हिडीओत पाहायला मिळत आहे. चाहतीने प्रेम व्यक्त केल्यानंतर त्याने हात जोडत तिचे आभार मानले आहेत. त्यानंतर चाहतीने आय लव्ह यू म्हणताच विकी कौशलने तिला “आय लव्ह यू टू” म्हटल्यानंतर तिचा आनंद गगनात मावेनासा झाल्याचं व्हिडीओत दिसत आहे. विकीने त्या चाहतीला मिठी मारल्याचंही व्हिडीओत पाहायला मिळत आहे. विकी कौशलचा हा व्हिडीओ सोशल मीडियावर व्हायरल झाला आहे.
हेही वाचा>> २ हजार रुपयांच्या नोटबंदीनंतर ‘शार्क टँक इंडिया’ फेम अनुपम मित्तलचं ट्वीट, मोदी सरकारवर टीका करत म्हणाला…
विकी कौशलने अभिनयाच्या जोरावर मनोरंजनविश्वात स्वत:चं वेगळं स्थान निर्माण केलं. विकी व कतरिना कैफने डिसेंबर २०२१मध्ये लग्नगाठ बांधत नव्या आयुष्याला सुरुवात केली. ते बॉलिवूडमधील लोकप्रिय कपल आहेत.
