फराह खानने दिग्दर्शित केलेला शाहरुख खानची मुख्य भूमिका असलेला ‘हॅपी न्यू इयर’ चित्रपट रिलीज होऊन आता १० वर्षे झाली आहे. त्यावर्षीच्या सर्वाधिक कमाई करणाऱ्यांपैकी एक हा चित्रपट होता. मात्र हा चित्रपट बरीच वर्षे रखडला होता. जवळपास आठ कलाकारांनी सिनेमा नाकारला होता. फराहला ज्या कलाकारांबरोबर सिनेमा करायचा होता, त्यापैकी फक्त एकाच अभिनेत्याने चित्रपटासाठी होकार दिला. बाकी सगळे वेगळे कलाकार होते.
हिंदुस्तान टाइम्सच्या वृत्तानुसार, फराह खानने २००४ मध्ये आलेल्या ‘मैं हूं ना’च्या यशानंतर ‘हॅपी न्यू इयर’ बनवायचा ठरवलं होतं. तिला अमिताभ बच्चन, शाहरुख खान, अक्षय कुमार, जुही चावला, मनीषा कोईराला, अमिषा पटेल, प्रियांका चोप्रा, रवीना टंडन आणि झायेद खान यांना सिनेमात घ्यायचं होतं, पण तसंच काहीच घडलं नाही.
हेही वाचा – राजीव कपूर यांना दारूचं व्यसन होतं, प्रसिद्ध अभिनेत्रीचा खुलासा; म्हणाली, “त्यांच्या निधनाच्या एक दिवसाआधी…”
२००६ मध्ये फराह खानने दीपिका पादुकोणला या चित्रपटासाठी साइन केलं होतं. पण जेव्हा ‘हॅप्पी न्यू इयर’ नंतर मागे पडला आणि तिने तिला ‘ओम शांती ओम’मध्ये घेतलं. ‘हॅप्पी न्यू इयर’ पुढची ६ वर्षे तसाच राहिला. या काळात फराहने ‘ओम शांती ओम’ आणि ‘तीस मार खां’ सारखे चित्रपट केले. २००९ मध्ये शिरीष कुंदरशी भांडण झाल्यावर शाहरुख आणि फराहमध्ये मतभेद झाले होते. आता ‘हॅपी न्यू इयर’ हा चित्रपट बनणार नाही, असं अनेकांना वाटत होतं. मग २०१२ मध्ये फराह आणि शाहरुखचे मतभेद दूर झाले आणि ‘हॅपी न्यू इयर’वर काम सुरू झाले.
८ कलाकारांनी नाकारलेला सिनेमा
त्याचवर्षी ऑक्टोबरपर्यंत चित्रपटाचं स्क्रिप्टिंग पूर्ण झालं आणि शाहरुखने मुख्य भूमिकेसाठी होकार दिला. त्याआधी प्रियांका चोप्राला मुख्य भूमिकेसाठी निवडं होतं, पण नंतर तारखा जुळून न आल्याने तिने नकार दिला. मग सोनाक्षी सिन्हा, असिन, ऐश्वर्या राय बच्चन, परिणीती चोप्रा आणि कतरिना कैफसह इतर अनेक अभिनेत्रींचा विचार करण्यात आला. पण कोणत्या ना कोणत्या कारणाने त्यांनीही नकार दिला. शेवटी या भूमिकेसाठी दीपिका पादुकोणला निवडलं. जॉन अब्राहम आणि पृथ्वीराज सुकुमारन यांनीही हा चित्रपट नाकारला होता. अखेर सोनू सूदला त्या भूमिकेसाठी घेण्यात आलं होतं. मग नोव्हेंबर २०१३ मध्ये ‘हॅपी न्यू इयर’चे शूटिंग सुरू झाले.
२०१४ मध्ये सर्वाधिक कमाई करणारा तिसरा चित्रपट
शाहरुख खानचा चित्रपट ‘हॅपी न्यू इयर’ ऑक्टोबर २०१४ मध्ये प्रदर्शित झाला होता. बॉलीवूड हंगामाच्या वृत्तानुसार, या चित्रपटाने भारतात २८१.९४ कोटी रुपयांची कमाई केली होती. तसेच जगभरात या सिनेमाने ३८३.१ कोटी रुपये कलेक्शन केले होते. हा २०१४ मधील तिसरा सर्वाधिक कमाई करणारा चित्रपट होता.
