करण जोहर दिग्दर्शित ‘रॉकी और रानी की प्रेम कहानी’ हा चित्रपट २८ जुलै रोजी प्रदर्शित होणार आहे. या चित्रपटात अभिनेत्री आलिया भट्ट आणि अभिनेता रणवीर सिंग मुख्य भूमिकेत दिसणार आहेत. ‘गली बॉय’सारख्या सुपरहीट चित्रपटानंतर ही जोडी पुन्हा मोठ्या पडद्यावर रोमान्स करताना दिसणार आहे. नुकताच या चित्रपटाचा प्रीमियर शो आयोजित करण्यात आला होता. या प्रीमियर शोला काही बॉलिवूड कलाकारांनी हजेरी लावली होती.
प्रीमियरला हजर असलेल्या बऱ्याच लोकांना हा चित्रपट प्रचंड आवडला. त्याबद्दल त्यांनी प्रतिक्रियाही दिली. प्रसिद्ध समीक्षक आणि ट्रेड एक्स्पर्ट तरण आदर्श यांनीदेखील या प्रीमियरला हजेरी लावली होती. नुकतंच त्यांनी त्यांच्या सोशल मीडिया अकाऊंटच्या माध्यमातून या चित्रपटाचं एका शब्दात समीक्षण करत त्याला रेटिंग दिलं आहे.
आणखी वाचा : राजेश खन्ना यांच्या निधनानंतर नसीरुद्दीन शाह यांनी केलेली टीका; सुपरस्टारला म्हणाले ‘फालतू अभिनेता’
तरण आदर्श यांना हा चित्रपट प्रचंड आवडला असून त्यांनी या चित्रपटाला ४ स्टार रेटिंग दिलं आहे. चित्रपटातील नाट्य, रोमान्स, ड्रामा, संगीत, सगळ्याच गोष्टींचं कौतुक तरण आदर्श यानी केलं असून त्यांना या चित्रपटाचं समीक्षण एका शब्दात ‘टेरीफीक’ असं केलं आहे. याबरोबरच त्यांनी रणवीर सिंग आणि आलिया भट्टच्या कामाचीही प्रशंसा केली आहे.
सध्या या चित्रपटाची सोशल मीडियावर जोरदार चर्चा सुरु आहे. तसेच या चित्रपटात दिग्गज अभिनेत्री जया बच्चन, अभिनेते धर्मेंद्र, शबाना आझमी यांच्याही महत्त्वाच्या भूमिका आहेत. करण जोहर बऱ्याच वर्षांनी पुन्हा दिग्दर्शनात कमबॅक करत असल्याने त्याच्यासाठी हा अत्यंत महत्त्वाचा चित्रपट आहे. एकूणच लोकांची प्रतिक्रिया आणि समीक्षकांनी केलेलं कौतुक पाहता हा चित्रपट बॉक्स ऑफिसवर यशस्वी ठरेल अशी शक्यता वर्तवली जात आहे.
