First Photo of Saif Ali Khan Attacker : सैफ अली खानवर आज (१६ जानेवारीला) मध्यरात्री चोरट्याने हल्ला केला. या घटनेत अभिनेता गंभीर जखमी झाला आहे. सैफवर लीलावती रुग्णालयात शस्त्रक्रिया करण्यात आली असून आता त्याची प्रकृती स्थिर आहे. आता या प्रकरणातील एक महत्त्वाची अपडेट समोर आली आहे.
सैफवर हल्ला करणाऱ्याचा पहिला फोटो पोलिसांनी प्रसारित केला आहे. सीसीटीव्ही फुटेजमध्ये हा आरोपी पायऱ्यांवरून खाली उतरताना कैद झाला. या सीसीटीव्ही फुटेजमधील एक फोटो पोलिसांनी प्रसिद्ध केला आहे. आरोपी मध्यरात्री २ वाजून ३३ मिनिटं व ५६ सेकंदांनी या सीसीटीव्ही कॅमेऱ्यात कैद झाला आहे. आरोपीबद्दल अधिक माहिती अजून आलेली नाही.
हेही वाचा – सैफ अली खानवर हल्ला करणाऱ्याची ओळख पटली, पोलिसांची माहिती; चोरटा घरात नेमका कसा शिरला? जाणून घ्या
पाहा फोटो –
सैफवर झालेल्या हल्ल्याप्रकरणी मुंबई पोलिसांनी दिलेल्या माहितीनुसार, सुरुवातीच्या तपासात असं दिसतंय की हल्लेखोराने चोरीच्या उद्देशाने इमारतीच्या फायर एस्केप पायऱ्यांचा वापर करून सैफ अली खानच्या घरात प्रवेश केला होता. ही घटना मध्यरात्री अडीच वाजता घडली. चोरट्याला पाहून घरातील मदतनीसने आरडाओरडा करत मदतीसाठी अलार्म वाजवला. यानंतर सैफ अली खान खोलीत गेला, तिथे त्याची चोरट्याबरोबर झटापट झाली, यादरम्यान त्याने सैफवर सहा वेळा चाकूने वार केले. तसेच घरातील मदतनीसही जखमी झाली आहे, तिच्या हाताला किरकोळ दुखापत झाली. त्यानंतर घुसखोर घटनास्थळावरून पळून गेला आणि त्याला शोधण्यासाठी पोलिसांनी १० पथके तयार केली आहेत.
हेही वाचा – चोराने सैफवर हल्ला केल्यावर ‘हे’ दोघे पोहोचले मदतीला; इब्राहिमने बाबाला रिक्षातून नेलं रुग्णालयात
आरोपीचा पहिला फोटो पोलिसांनी प्रसारित केला असला तरी अद्याप त्याला अटक करण्यात आलेली नाही. पोलिसांची पथकं आरोपीचा शोध घेत आहेत. या आरोपीने केलेल्या हल्ल्यात सैफ व त्याच्या घरातील मदतनीस असे दोघेही जण जखमी झाले. मदतनीस किरकोळ जखमी झाल्याने तिला उपचारानंतर घरी पाठवण्यात आलं आहे. दुसरीकडे सैफ गंभीर जखमी असल्याने अद्याप लीलावती रुग्णालयात आहे.
