४ एप्रिल रोजी सलमान खानच्या ‘किसी का भाई किसी की जान’ या चित्रपटातील ‘येंतम्मा’ हे गाणे प्रदर्शित झाले. या गाण्यात तेलुगू आणि हिंदी भाषांचा वापर करण्यात आला आहे. सलमान खानच्या या चित्रपटाची सगळेच आतुरतेने वाट बघत आहेत. ही नवीन बातमी नाही. नुकतंच एका माजी क्रिकेटपटूने या गाण्याच्या बाबतीत पोस्ट करत नाराजी व्यक्त केली आहे.
भारताचा माजी फिरकी गोलंदाज लक्ष्मण शिवरामकृष्णन यांच्या मते हे अतिशय विद्रूप गाणे आहे आणि दक्षिण भारतीय संस्कृतीसाठी हे अपमानकारक आहे. ‘यंतम्मा’ या गाण्याबाबत लक्ष्मण यांनी आपल्या ट्वीटमध्ये लिहिले, “हे अत्यंतविचित्र आणि हास्यास्पद आहे आणि आपल्या दक्षिण भारतीय संस्कृतीला तुच्छ लेखणारं आहे. ही लुंगी नाही, याला धोतर म्हणतात, आपल्या पारंपरिक पोषाखाची यात खिल्ली उडवण्यात आली आहे.”
आणखी वाचा : ‘या’ सेलिब्रिटींनीसुद्धा केलेला अभिनयाचा प्रयत्न; यांचे चित्रपट पाहून प्रेक्षकही म्हणाले “उठा ले रे देवा”
गाण्यात सलमान खान आणि व्यंकटेश मुंडू परिधान करून नृत्य करताना दिसत आहे. मुंडू हा एक पारंपरिक पोशाख आहे जो सण आणि इतर शुभमुहूर्ताच्या दिवशी परिधान केलं जातं. तर लुंगी हे घरात परिधान केले जाणारे वस्त्र मानले जाते. या प्रकरणावर लक्ष्मण शिवरामकृष्णन यांनी नाराजी व्यक्त केली आहे. त्यांनी आणखीनही ट्वीट करत नेमकं लुंगी आणि धोतर यातला फरक समजावून देण्याचा प्रयत्न केला आहे.
ऐंशीच्या दशकात लक्ष्मण यांनी आपल्या क्रिकेट कारकिर्दीला सुरुवात केली. १९८३ मध्ये त्यांनी पहिला कसोटी सामना वेस्ट इंडिजविरुद्ध खेळला. त्यांचा शेवटचा आंतरराष्ट्रीय कसोटी सामना १९८६ मध्ये ऑस्ट्रेलियाविरुद्ध होता. सलमानचे ‘येंतम्मा’ हे गाणे विशाल ददलानी आणि पायल देव यांनी गायले आहे. या गाण्यात सलमान आणि व्यंकटेशसह दाक्षिणात्य अभिनेता राम चरणही दिसत आहे. त्याने यात कॅमिओ केला आहे. सलमानचा ‘किसी का भाई किसी की जान’ हा चित्रपट २१ एप्रिल रोजी प्रदर्शित होणार आहे.
