कोविडदरम्यान दाक्षिणात्य चित्रपटांनी बॉक्स ऑफिसवर आपली चांगलीच पकड घेतली. ‘केजीएफ २’ ‘पुष्पा’, ‘आरआरआर’पासून ‘कांतारा’पर्यंत कित्येक चित्रपट हिट ठरले. याचदरम्यान बॉलिवूड चित्रपटांकडे मात्र प्रेक्षकांनी पाठ फिरवली. ‘बॉयकॉट बॉलिवूड’ हा ट्रेंड आमिर खानच्या चित्रपटापासून सुरू झाला तो काही केल्या थांबायचं नाव घेत नव्हता. अखेर यंदा शाहरुख खानच्या ‘पठाण’ने याला लगाम घातला अन् बॉलिवूड चित्रपटांनी पुन्हा उभारी घ्यायला सुरुवात केली.
२०२३ चा ऑगस्ट महिना तर हिंदी चित्रपट आणि खासकरून बॉलिवूडसाठी अगदीच खास ठरला. ऑगस्ट महिन्याचं बॉक्स ऑफिसवरील चित्र हे फार वेगळं असून, या महिन्यात तब्बल एक दोन नव्हे तर तब्बल ४ हिंदी चित्रपटांनी बॉक्स ऑफिसवर धुमाकूळ घातला आहे. या चारही चित्रपटांनी मिळून एका महिन्यात जबरदस्त कमाई केली आहे.
आणखी वाचा : “मी चित्रपटाचं स्क्रिप्ट…” चित्रपटांच्या अपयशाबाबत नवाजुद्दिन सिद्दिकीने सोडले मौन
या चारही चित्रपटांनी एका महिन्यात एकूण ७५० कोटींची रेकॉर्ड ब्रेकिंग कमाई केली आहे. करण जोहरच्या ‘रॉकी और रानी की प्रेम कहानी’ या चित्रपटाने १४८.७९ कोटींची कमाई केली तर सनी देओलच्या ‘गदर २’ने ४५६ कोटींचा गल्ला जमवला. अक्षय कुमारच्या ‘ओएमजी २’ने १३२ कोटींची कमाई केली तर नुकत्याच प्रदर्शित झालेल्या आयुष्मान खुरानाच्या ‘ड्रीम गर्ल २’ने आत्तापर्यंत ४० कोटींची कमाई केली आहे.
हे चारही हिंदी चित्रपट बॉक्स ऑफिसवर अजूनही कमाई करत आहेत. यामध्ये रजनीकांत यांचा ‘जेलर’ प्रदर्शित झाला, त्यानेही उत्तम कमाई केली पण अजूनही बॉक्स ऑफिसवर या ४ चित्रपटांचा डंका वाजतोच आहे. यामुळे नेपोटीजम किंवा कंपूशाहीमुळे ‘बॉयकॉट बॉलिवूड’चा ट्रेंड चालवणाऱ्या लोकांना या चार हिंदी चित्रपटांनी त्याच्या बॉक्स ऑफिस कलेक्शनमधून चोख उत्तर दिल्याचं चित्र पाहायला मिळत आहे.
