Anant Ambani Radhika Merchant Pre Wedding In Jamnagar : रिलायन्स समुहाचे अध्यक्ष मुकेश अंबानी यांचा धाकटा मुलगा अनंत अंबानींच्या प्री-वेडिंग सोहळ्याची सध्या जोरदार चर्चा चालू आहे. गुजरातमधील जामनगरमध्ये आजपासून ( १ मार्च २०२४ ) ते ३ मार्चपर्यंत हा कार्यक्रम पार पडणार आहे. या कार्यक्रमासाठी जामनगरमध्ये संपूर्ण सिनेसृष्टी अवतरल्याचं पाहायला मिळत आहे. अनिल कपूर, शाहरुख खान, सैफ अली खान असे बॉलीवूडचे बडे स्टार्स अनंत अंबानींच्या प्री-वेडिंग कार्यक्रमासाठी जामनगरमध्ये दाखल झाले आहेत.
अनंत-राधिकाच्या प्री-वेडिंग सोहळ्याचं निमंत्रण कलाविश्वापासून ते क्रिकेटविश्वातील मान्यवरांपर्यंत प्रत्येकाला देण्यात आलं आहे. उद्धव ठाकरे व कुटुंबीय, मिसेस उपमुख्यमंत्री अमृता फडणवीस असे राजकीय क्षेत्रातील मान्यवर सुद्धा प्री-वेडिंग सोहळ्यासाठी जामनगरला पोहोचले आहेत. सध्या या सगळ्यांचे व्हिडीओज सोशल मीडियावर व्हायरल होत आहेत. या सगळ्या पाहुण्यांचं जामनगरमध्ये जंगी स्वागत होत असल्याचं या व्हिडीओजमध्ये पाहायला मिळत आहे.
हेही वाचा : लग्नानंतर पूजा सावंत-सिद्धेश चव्हाण यांनी जोडीने केली सत्यनारायण पूजा! बहिणीने शेअर केला खास फोटो
बॉलीवूडची धकधक गर्ल माधुरी दीक्षित व तिचे पती डॉ. श्रीराम नेने देखील प्री-वेडिंग सोहळ्याला उपस्थित राहणार आहेत. अशातच विमानतळावर महाराष्ट्राचे लाडके दादा-वहिनी रितेश-जिनिलीया यांनी सर्वांचं लक्ष वेधून घेतलं. पापाराझींना नमस्कार करून अभिनेत्रीने यावेळी पोज दिल्या.
रितेश-जिनिलीयाला पाहून पापाराझींनी त्यांना “दादा-वहिनी”, “दादा… जय महाराष्ट्र” अशा हाका मारून मराठीत संवाद साधला. सध्या या जोडप्याच्या व्हिडीओवर नेटकरी कौतुकाचा वर्षाव करत आहेत.
दरम्यान, प्री-वेडिंग कार्यक्रमाच्या पार्श्वभूमीवर अंबानी कुटुंबाकडून जामनगरमध्ये जय्यत तयारी करण्यात आली आहे. पाहुण्यांसाठी खास आलिशान तंबू उभारण्यात आले आहेत. या तंबूमध्ये सोफा, बेड, फ्रीज, टीव्हीपासून, एसीपर्यंतच्या अत्याधुनिक सुविधा देण्यात आल्या आहेत.