मराठीसह बॉलीवूडवर अधिराज्य गाजवणारा अभिनेता रितेश देशमुख आज त्याचा ४५ वा वाढदिवस साजरा करत आहे. यानिमित्ताने त्याची पत्नी जिनिलीयाने खास रोमँटिक पोस्ट शेअर करून लाडक्या नवऱ्याला शुभेच्छा दिल्या आहेत.
रितेश देशमुखने ‘तुझे मेरी कसम’ या बॉलीवूड चित्रपटातून कलाविश्वात पदार्पण केलं. या चित्रपटाच्या निमित्तानेच रितेश-जिनिलीयाची पहिली भेट झाली होती. चित्रपटाच्या सेटवर झालेल्या मैत्रीचं पुढे प्रेमात रुपांतर झालं. एकमेकांना जवळपास ८ वर्ष डेट केल्यावर या दोघांनी २ फेब्रुवारी २०१२ मध्ये लग्न केलं. आता या जोडप्याला रियान व राहील अशी दोन मुलं आहेत.
आज लाडक्या नवऱ्याच्या वाढदिवसानिमित्त जिनिलीयाने खास पोस्ट शेअर करून सर्वांचं लक्ष वेधलं आहे. ती लिहिते, “जर रितेश देशमुख कोण आहे? असा प्रश्न मला कोणी विचारला, तर मी एवढंच म्हणेन, तो संपूर्ण जगातला खूपच चांगला मनुष्य आहे आणि तो फक्त माझा आहे. Happy Birthday नवरा!” जिनिलीयाने शेअर केलेल्या पोस्टवर रितेश कमेंट करत म्हणतो, “आय लव्ह यू बायको…तू माझ्यासाठी काय आहेस याची कदाचित तुला कल्पनाही नसेल. तू माझं आयुष्य खऱ्या अर्थाने सुंदर बनवलंस.”
रितेश-जिनिलीयाची जोडी मराठीसह बॉलीवूडमध्ये प्रचंड लोकप्रिय आहे. दोघांनाही महाराष्ट्राचे दादा-वहिनी म्हणून ओळखलं जातं. त्यामुळे अभिनेत्रीने शेअर केलेल्या पोस्टला अवघ्या एका तासांत दीड लाखांहून अधिक लाइक्स मिळाले आहे. चाहत्यांसह कलाकार मंडळीनी तिच्या पोस्टवर रितेशच्या वाढदिवसानिमित्त शुभेच्छांचा वर्षाव केला आहे. दरम्यान, अभिनेत्याच्या कामाबद्दल सांगायचं झालं, तर लवकरच रितेश बहुचर्चित ‘हाऊसफुल’ सीरिजच्या पाचव्या भागात झळकणार आहे.
