बॉलिवूड अभिनेता हृतिक रोशन हा सध्याच्या तरुणाईच्या गळ्यातील ताईत आहे. त्याचा याचवर्षी प्रदर्शित झालेला ‘विक्रम वेधा’ फारसा चालला नसला तरी प्रेक्षकांनी हृतिकच्या कामाचं कौतुक केलं. नुकतंच हृतिकने एका मुलाखतीमध्ये त्याच्या पहिल्या चित्रपटाच्या काही आठवणी सांगितल्या आहेत. शिवाय ‘कहो ना प्यार है’ या चित्रपटातून मिळालेल्या स्टारडमबद्दल, लोकप्रियतेबद्दल हृतिकने भाष्य केलं आहे.
नुकतंच हृतिकने युट्यूबवर ‘गलाट्टा प्लस’शी संवाद साधला आणि त्याच्या चित्रपटातील अनुभवाबद्दल खुलासा केला आहे. यावर्षी आलेला हृतिकचा ‘विक्रम वेधा’ फारसा चालला नाही, दाक्षिणात्य चित्रपटाचा रिमेक असूनही या चित्रपटाने फारशी कमाई केलेली नाही. बॉयकॉट ट्रेंड आणि लोकांचा बॉलिवूडबद्दल निर्माण झालेला गैरसमज हे याला कारणीभूत ठरलं असलं तरी हा चित्रपट सपशेल आपटला आहे हेदेखील हृतिकने या मुलाखतीमध्ये मान्य केलं आहे.
आणखी वाचा : “सर्वात यशस्वी महिला निर्माती…” विवेक अग्निहोत्री यांनी केलं पत्नीचं कौतुक; मात्र पल्लवी जोशी झाली नाराज
चित्रपटसृष्टीत मिळालेलं स्टारडम आणि लोकप्रियता याबद्दलही हृतिकने या मुलाखतीमध्ये भाष्य केलं आहे. तो म्हणाला, “एक अभिनेता म्हणून मी प्रेक्षकांना उत्तर द्यायला बांधील आहे आणि माझ्या जबाबदारीची मला पूर्ण जाणीव आहे. मला मिळालेली लोकप्रियता म्हणजेच स्टारडम ही सर्वात मोठी भेटवस्तू आहे आणि माझ्या डोक्यावर त्याचं ओझं कायम असतं. यासाठी मला प्रचंड मेहनतही घ्यावी लागते, कारण मला प्रेक्षकांच्या स्मरणात राहायचं आहे, याच क्षेत्रात मला पुढे प्रगती करायची आहे.”
याबरोबरच या मुलाखतीमध्ये हृतिकने त्याच्या आवडत्या चित्रपटाबद्दलही खुलासा केला आहे. ‘कोई मिल गया’ हा हृतिकला त्याचा सर्वात आवडलेला चित्रपट आहे. हृतिक रोशन आणि अमीषा पटेलच्या ‘कहो ना प्यार है’ या चित्रपटाने बॉक्स ऑफिसवर जबरदस्त कमाई केली होती. या चित्रपटामुळे हृतिक रातोरात स्टार झाला.
