‘द आर्चीज’ चित्रपटातून बॉलीवूडचे दिग्गज अभिनेते अमिताभ बच्चन यांचा नातू अगस्त्य नंदा, शाहरुखची मुलगी सुहाना खान आणि श्रीदेवी यांची मुलगी खुशी कपूर बॉलीवूडमध्ये पदार्पण करणार आहे. ‘द आर्चीज’ चित्रपटाचे दिग्दर्शन झोया अख्तर करणार असून हा चित्रपट लवकरच नेटफ्लिक्सवर प्रदर्शित होणार आहे. ‘द आर्चीज’चे नवे पोस्टर लॉन्च केल्यावर करणने अगस्त्य नंदा आणि सुहाना खान यांच्यासाठी खास पोस्ट शेअर केली आहे.
करण जोहर अगस्त्य नंदा आणि सुहाना खानचे कौतुक करताना लिहितो की, “बालपणी ज्या मुलांना मी मांडीवर खेळवले होते, ती सगळी मुलं आज आयुष्याच्या नव्या वाटेवर एक नवी सुरुवात करण्यासाठी सज्ज होत आहेत. कधीकधी विश्वास होत नाही ही मुलं किती लवकर मोठी होतात. सुहानासह या सगळ्या मुलांना त्यांच्या आगामी चित्रपटासाठी खूप खूप शुभेच्छा”
हेही वाचा : Video : महेश मांजरेकरांच्या लेकीची ‘ती’ कृती पाहून नेटकऱ्यांनी केले कौतुक; म्हणाले “सई मराठी आहे म्हणून…”
नेटफ्लिक्सवर प्रदर्शित होणाऱ्या ‘द आर्चीज’चित्रपटाचे पोस्टर नुकतेच प्रदर्शित करण्यात आले आहे. चित्रपटाची दिग्दर्शिका झोया अख्तरने तिच्या इंस्टाग्राम अकाऊंटवर चित्रपटाचे नवे पोस्टर शेअर केले आहे. या पोस्टरमध्ये सुहाना खान, अगस्त्य नंदा, खुशी कपूर, डॉट, वेदांग रैना, मिहिर आहुजा आणि युवराज मेंडा असे नवोदित कलाकार दिसत आहेत. चित्रपटाची संपूर्ण टीम ब्राझीलमध्ये १६ ते १८ जूनला होणाऱ्या नेटफ्लिक्सच्या कार्यक्रमाला हजेरी लावणार आहे. यावेळी चित्रपटाचा ट्रेलर प्रदर्शित करण्यात येईल असे सांगण्यात येत आहे.
दरम्यान, करण जोहरचा ‘रॉकी और रानी की प्रेम कहानी’ हा चित्रपट २९ जुलै रोजी प्रेक्षकांच्या भेटीला येणार आहे. या चित्रपटात अभिनेता रणवीर सिंह आणि अभिनेत्री आलिया भट्ट मुख्य भूमिकेत दिसणार आहेत. या चित्रपटाचा टीझर १६ जून रोजी प्रदर्शित होण्याची शक्यता आहे.
