काही दिवसांपूर्वी ‘डॉन ३’ चित्रपटाची घोषणा झाली, त्याचा टीझरही समोर आला असून यात रणवीर सिंह मुख्य भूमिकेत दिसणार आहे. या चित्रपटात काम करण्यासाठी टीव्हीवरील सुप्रसिद्ध अभिनेता करणवीर बोहराने दीपिका पदुकोणला मेसेज केला होता. करण सध्या ‘हम रहें ना रहें हम’ मध्ये नकारात्मक भूमिका करत आहे. रणवीर सिंह मुख्य भूमिकेत असल्याने त्याने ‘डॉन ३’ मध्ये भूमिका मागण्यासाठी दीपिकाशी संपर्क साधल्याचा खुलासा केला.
एका वेबसाइटशी बोलताना करणवीर म्हणाला, “जेव्हा मला कळलं की रणवीर सिंग डॉन ३ मध्ये मुख्य भूमिका करत आहे, तेव्हा मी त्याच्या विरुद्ध खलनायकाची भूमिका करण्यास उत्सुक होतो. पण मी फरहान अख्तर किंवा त्याच्या प्रोडक्शन हाऊसमधील कोणालाही ओळखत नाही. म्हणून मी रणवीरची पत्नी दीपिकाला मेसेज केला. मला वाटलं नशीब आजमावून पाहायला काय हरकत आहे. दीपिका आणि मी एकमेकांना ओळखतो, पण फार भेटत नाही. मी तिला एक मेसेज केला आणि चित्रपटाचा भाग बनण्याची माझी इच्छा व्यक्त केली.”
करणने मेसेज केल्यावर दीपिकाने त्याला रिप्लाय केला. तिने त्याला कास्टिंग डायरेक्टरचा नंबर पाठवला आणि म्हणाली, “मी तुला फार मदत करू शकत नाही, परंतु चित्रपट बनवणाऱ्या बॅनरसाठी कास्टिंग करणाऱ्या व्यक्तीचे नाव मी सांगून मदत करू शकते”. करण म्हणाला, “योगायोगाने माझ्याकडे त्या व्यक्तीचा नंबर होता. मी त्याला मेसेज केला आणि माझ्यासाठी कोणती भूमिका असेल तर कळवा, मला काम करायला आवडेल, असं सांगितलं.”
दरम्यान, करणवीर बोहरा सध्या ‘हम रहें ना रहें हम’ या मालिकेत नकारात्मक भूमिका साकारतोय. सोमवारी २८ ऑगस्ट रोजी त्याचा ४१ वा वाढदिवस झाला. त्याने मध्यरात्री त्याच्या शोमधील कलाकारांसोबत वाढदिवस साजरा केला होता.
