अभिनेता कार्तिक आर्यन व अभिनेत्री कियारा अडवाणी यांच्या ‘सत्यप्रेम की कथा’ या चित्रपटानं ११ व्या दिवशी बॉक्स ऑफिसवर चांगली कमाई केली आहे. प्रदर्शनानंतर या चित्रपटाची कामगिरी धीम्या गतीनं सुरू झाली होती. त्यानंतर दिवसेंदिवस या चित्रपटाच्या कमाईत वाढ झाल्याचं पाहायला मिळालं. मग थेट ११व्या दिवशी ‘सत्यप्रेम की कथा’ या चित्रपटानं मोठा गल्ला जमवला आहे.
Sacnilkच्या वृत्तानुसार सहा दिवसांनंतर रविवारी ‘सत्यप्रेम की कथा’ चित्रपटानं पुन्हा बॉक्स ऑफिसवर दमदार एंट्री घेतली. म्हणजेच सहा दिवसांत जेवढी कमाई या चित्रपटानं केली, त्यापेक्षा जास्त कमाई ११ व्या दिवशी केली. कार्तिकच्या या चित्रपटानं रविवारी ५.२५ कोटींची कमाई केली. त्यामुळे आता एकूण ६६.०६ कोटींचा गल्ला ‘सत्यप्रेम की कथा’ या चित्रपटानं जमवला आहे. या चित्रपटासाठी आलेला खर्च ६० कोटी रुपये वसूल झाल्याचं म्हटलं जात आहे.
हेही वाचा – “वडिलांचं नाव धुळीत…” असं म्हणत महिलेनं अभिषेक बच्चनच्या लगावली होती कानशिलात, नेमकं काय घडलं?
‘सत्यप्रेम की कथा’ चित्रपटाच्या ११ व्या दिवशी झालेल्या कमाईची तुलना ‘आदिपुरुष’बरोबर केली जात आहे. कार्तिकच्या चित्रपटानं प्रभासच्या चित्रपटाला मागे टाकल्याचं दिसत आहे. ‘आदिपुरुष’नं ११ व्या दिवशी २.१३ कोटींची कमाई केली होती. या दोन्ही चित्रपटांच्या कमाईत फक्त एवढाच फरक होता की, ‘सत्यप्रेम की कथा’ चित्रपटाच्या ११ व्या दिवशी रविवार होता; तर ‘आदिपुरुष’च्या ११ व्या दिवशी सोमवार होता.
हेही वाचा – ‘आदिपुरुष’मधील कुंभकर्ण दररोज २० पोळ्या, २५ अंडी व १ किलो खायचा चिकन, कोण आहे ‘हा’ अभिनेता जाणून घ्या
कार्तिक-कियाराच्या या चित्रपटाच्या दिग्दर्शनाची धुरा मराठमोळा दिग्दर्शक समीर विद्वांसनं सांभाळली. या चित्रपटात सुप्रिया पाठक आणि गजरात रावदेखील महत्त्वाच्या भूमिकांत आहेत. या दोघांनी कार्तिकच्या पालकांची भूमिका साकारली आहे; तर अनुराधा पटेल व सिद्धार्थ रांदेरिया हे कियाराच्या आई-वडिलांच्या भूमिकांत आहेत. शिवाय या चित्रपटात राजपाल यादवही महत्त्वाच्या भूमिकेत आहेत.
