Kashmera Shah : अपघात किंवा आजारी पडल्यानंतर आपल्याला डॉक्टरांनी सांगितलेले काही सल्ले फॉलो करावे लागतात. लवकर बरं होण्यासाठी आपण ते फॉलो करतो. जेव्हा शरीरावर काही जखमा असतात तेव्हा त्यावर बँडेज किंवा मग पट्टी बांधली जाते. अशा स्थितीत बाहेर पडल्यावर प्रत्येक व्यक्ती आपल्याला पाहून वेगळ्या पद्धतीने रिॲक्ट होतात. बाहेरील व्यक्ती काहीवेळा आपल्याला पाहून हास्यास्पद प्रतिक्रिया देतात, तर काहीवेळा वाईट वाटेल असंही म्हणतात. असंच काहीसं प्रसिद्ध कॉमेडियन कृष्णा अभिषेकची पत्नी कश्मीरा शाहबरोबर घडलं आहे.
१८ नोव्हेंबर रोजी कश्मीरा शाहचा एक भीषण अपघात झाला. अपघातामध्ये ती एका काचेला धडकली होती, त्यामुळे तिच्या नाकाला जखम झाली. जखम जास्त असल्याने कश्मीराच्या नाकातून रक्तस्त्राव होऊ लागला. यावर तिला तातडीने रुग्णालयात दाखल करून तिच्यावर उपचार करण्यात आले. आता तिची प्रकृती स्थिर आहे. बरं वाटल्यानंतर तिने सोशल मीडियावर चाहत्यांना तिच्या प्रकृतीची अपडेटही दिली होती.
हेही वाचा : माधुरी दीक्षितवर जडला जीव, मॅच फिक्सिंगमध्ये अडकला अन् तिने…; भारताच्या सर्वात श्रीमंत क्रिकेटपटूची अधुरी प्रेमकहाणी
तीन दिवसांपूर्वी तिने सोशल मीडियावर एक व्हिडीओ पोस्ट केला होता. त्यात तिच्या नाकाला असलेली जखम अजून पूर्ण बरी न झाल्याने तिने त्यावर एक बँडेज लावलं होतं. व्हिडीओमध्ये तिने याची माहिती देत तिच्या चाहत्यांना काळजी केल्याबद्दल धन्यवादही म्हटलं होतं. त्यानंतर आता कश्मीराने पुन्हा एक व्हिडीओ इन्स्टाग्रामवर पोस्ट केला आहे. या व्हिडीओमध्ये तिने नाकावर असलेल्या बँडेजमुळे तिला आलेला अनुभव चाहत्यांबरोबर शेअर केला आहे.
नाकावर बँडेज असल्याने कोणी माझ्याशी बोलत नाही, असं तिने यात सांगितलं आहे. तसेच तिला आता या बँडेजचा फार कंटाळा आला आहे, असं तिने यात म्हटलं आहे. कश्मीरा यामुळे त्रासली आहे. मात्र, तिने व्हिडीओ शेअर करत विनोदी अंदाजात याची माहिती आणि आलेला अनुभव सांगितला आहे.
नेमकं काय म्हणाली कश्मीरा?
“मी आधी पोस्ट केलेला व्हिडीओ एका डॉक्टरांनी पाहिला आणि त्यांनी मला फोन करून मोठं बँडेज लावण्यास सांगितलं. मला हे बँडेज अजिबात आवडत नाही. मी कोणत्या दुकानात गेले तर कोण माझी मदत करत नाही, कोण मला साधं हॅलोसुद्धा बोलत नाही. त्यांना वाटतं, मला हे बॉक्सिंग मॅचमध्ये लागलं आहे की काय. अरे, पण मी कुठे कुणाशी भांडण करते. मी एकदम शांत स्वभावाची मुलगी आहे, मी कधीच कुणाला काही बोलत नाही”, असं तिने या व्हिडीओमध्ये म्हटलं आहे.
हेही वाचा : ‘असा’ शूट झाला ‘ठरलं तर मग’ मालिकेचा बहुप्रतिक्षीत प्रोमो! सायलीने दाखवली झलक; नेटकरी म्हणाले, “जुई मॅम आम्ही खूप…”
कश्मीरा किती शांत आहे हे ती सांगत असताना व्हिडीओमध्ये अचानक हसण्याचा आवाज येत आहे. हसण्याचा आवाज ऐकून, “कृष्णाच्या हसण्याचा आवाज आला का?” असं म्हणते आणि पुढे तिला हे बँडेज अजिबात आवडलेलं नाही असं सांगते. तिच्या या मजेशीर व्हिडीओवर काही नेटकऱ्यांनीदेखील हसण्याचे इमोजी पाठवले आहेत. तसेच तिला “लवकर बरी हो”, अशा कमेंटही केल्या आहेत.
