दिवंगत अभिनेते देव आनंद यांनी त्यांच्या कारकिर्दीमध्ये अनेक गाजलेल्या चित्रपटांमध्ये काम केलं. त्यांची प्रत्येक भूमिका प्रेक्षकांच्या मनावर कोरली होती. दरम्यान देव आनंद यांचा जुहूतील बंगला विकला असल्याची बातमी नुकतीस समोर आली होती. ७३ वर्षीय हा जूना बंगला एका रिअल इस्टेट कंपनीला विकला असल्याचे सांगण्यात आले होते. या बातमीने अनेक चर्चांना उधाण आले होते. आता देव आनंद यांचा पुतण्या आणि चित्रपट निर्माते केतन आनंद यांनी या बातमीमागचं सत्य सांगितल आहे.
ईटाईम्सला दिलेल्या मुलाखतीत, केतन आनंद यांनी देव आनंद यांचा जुहूचा बंगला विकला असल्याचा दावा फेटाळून लावला आहे. केतन आनंद म्हणाले, “देव आनंद यांचा बंगला विकला असल्याची बातमी पूर्णपणे खोटी आहे. देव आनंद यांची मुलगी देविनाला याबाबत विचारलं आहे त्यांनी कोणताही बंगला विकलेला नाही.”
हिंदुस्तान टाईम्सने दिलेल्या बातमीनुसार, देव आनंद यांच्या कुटुंबाने त्यांचा जुहूचा प्रसिद्ध बंगला विकला आहे. दिवंगत अभिनेत्याने आपल्या आयुष्यातील ४० वर्षे पत्नी आणि मुलांसोबत या घरात घालवली होती. अहवालात दावा करण्यात आला होता की, देव आनंद यांचा बंगला ३५० ते ४०० कोटी रुपयांना विकला गेला आहे. लवकरच हा बंगला पाडण्यात येणार असून त्याजागी २२ मजली टॉवर बांधण्यात येणार असल्याचेही अहवालात म्हटले आहे.
हेही वाचा- प्रोपगंडा चित्रपटच का? ‘द व्हॅक्सिन वॉर’ दिग्दर्शक विवेक अग्निहोत्री यांनी खोडून काढले आरोप
देव आनंद यांच्या निधनानंतर या बंगल्याची देखभाल करण्यासाठी कोणीही नव्हतं. त्यामुळेच हा बंगला विकला गेल्याची माहिती मिळाली होती. देव आनंद यांचा मुलगा सुनील अमेरिकेत स्थायिक झाला आहे; तर त्यांच्या पत्नी कल्पना मुलगी देवीनाबरोबर उटी येथे राहतात. दरम्यान, देव आनंद यांच्या कुटुंबीयांनी पनवेलमधील काही जागाही विकल्या आहेत. मिळालेली रक्कम तीन जणांमध्ये वाटण्यात आली असल्याचे सांगण्यात आले होते.
