क्रिती सेनॉनने फार कमी वेळात बॉलिवूडच्या टॉप हिरोइन्समध्ये स्वतःचं स्थान निर्माण केले आहे. ९ वर्षांच्या कारकिर्दीत क्रितीने एक राष्ट्रीय पुरस्कार आणि दोन फिल्मफेअर पुरस्कार जिंकले आहेत. याशिवाय फोर्ब्सच्या १०० सेलिब्रिटींच्या यादीतही तिचा समावेश झाला आहे. अभिनेत्री होण्यापूर्वी क्रिती सॅनन एक मॉडेल होती. त्यादरम्यान अभिनेत्रीबरोबर अशा काही घटना घडल्या ज्याच्या आठवणी आजही तिच्या मनात ताज्या आहेत.
क्रिती सेनॉनने ‘कर्ली टेल्स’ला दिलेल्या मुलाखतीत तिच्या पहिल्या फॅशन शोचा किस्सा शेअर केला आहे. तिने सांगितले की एका कोरिओग्राफरने तिला इतर ५० मॉडेल्ससमोर अत्यंत वाईट शब्दांत फटकारले आणि त्यामुळे तिला रडू आले. क्रितीने बॅकअप प्लॅनसह फिल्मी दुनियेत प्रवेश केला होता, जेणेकरून तिचे पालक तिच्या भवितव्याबद्दल फार चिंता करणार नाहीत.
आणखी वाचा : ‘हा’ असेल अक्षय कुमारच्या फिल्मी करिअरमधील सर्वात महागडा चित्रपट; बजेट ऐकून व्हाल थक्क
क्रिती म्हणाली, ‘तो माझा पहिला रॅम्प शो होता आणि मी त्या कोरिओग्राफरबरोबर कधीच काम केले नव्हते. ती माझ्याशी खूप उद्धटपणे बोलत होती कारण माझ्याकडून चूक होत होती. ती माझी पहिलीच वेळ होती. तो अनुभव फारच वाईट होता. ५० इतर मॉडेल्ससमोर ती मला ओरडली ज्यामुळे मला रडू कोसळले. ती मला खूप शिव्या देत होती. ही घटना माझ्या मनात बराच काळ घर करून बसली.”
क्रिती आता लवकरच टायगर श्रॉफबरोबर ‘गणपत : पार्ट १’ या चित्रपटात झळकणार आहे. याशिवाय तिचा शाहिद कपूरबरोबरचा एक चित्रपट आहे आणि तिचा स्वतःचा प्रोडक्शन डेब्यू ‘दो पत्ती’ हे चित्रपटही मागोमाग येणार आहेत. क्रिती सेनॉन यावर्षी ‘आदिपुरुष’ आणि ‘शेहजादा’ या चित्रपटांमध्ये दिसली होती. दोन्ही चित्रपट बॉक्स ऑफिसवर फारशी कमाल दाखवू शकले नाहीत.
