Laila Majnu Re-Release box office collection : ‘अॅनिमल’ चित्रपटामुळे नॅशनल क्रश बनलेल्या तृप्ती डिमरीचा (Triptii Dimri) ‘लैला मजनू’ नावाचा चित्रपट २०१८ मध्ये प्रदर्शित झाला होता. इम्तियाज अली व एकता कपूरच्या या चित्रपटात तृप्ती डिमरी व अविनाश तिवारी (Avinash Tiwary) मुख्य भूमिकेत होते. साजिद अलीने दिग्दर्शित केलेला हा चित्रपट तेव्हा बॉक्स ऑफिसवर फ्लॉप झाला होता. पण आता सहा वर्षांनी तो पुन्हा प्रदर्शित झाला असून त्याचे कमाईचे आकडे चकित करणारे आहेत.
२०२४ मध्ये ‘रॉकस्टार’ पुन्हा रिलीज केल्यानंतर इम्तियाज अली आणि त्यांच्या टीमने ‘लैला मजनू’ला पुन्हा एकदा सिनेमागृहांमध्ये रिलीज करायचं ठरवलं. यासाठी त्यांनी नॅशनल सिनेमा सीरिजबरोबर भागीदारी केली. हा चित्रपट सर्वात आधी काश्मीरमधील एकाच सिनेमागृहात रिलीज करण्यात आला, तिथे त्याला स्थानिक प्रेक्षकांचा जबरदस्त प्रतिसाद मिळाला. या सकारात्मक प्रतिसादामुळे भारावलेल्या निर्मात्यांनी लगेचच संपूर्ण भारतातील मल्टिप्लेक्समध्ये चित्रपट प्रदर्शित करायचं ठरवलं.
दोन दिवसांची कमाई
आश्चर्याची गोष्ट अशी की २०१८ मध्ये हा चित्रपट प्रदर्शित झाला तेव्हा प्रेक्षकांनी याकडे पाठ फिरवली होती. आता ९ ऑगस्ट रोजी पुन्हा प्रदर्शित झालेल्या या चित्रपटाला प्रेक्षक मिळत आहेत. सॅकनिल्कच्या रिपोर्ट्सनुसार, ‘लैला मजनू’ने ९ ऑगस्ट रोजी ३० लाख रुपयांची ओपनिंग केली, त्यानंतर शनिवारी ११० टक्के वाढीसह ७० लाख रुपयांची कमाई केली. चित्रपटाची दोन दिवसांत एकूण कमाई एक कोटी रुपये झाली आहे.
चित्रपटाचे बजेट व २०१८ मधील एकूण कलेक्शन
Laila Majnu budget: रविवारसाठी तिकीटांची मोठ्या प्रमाणात विक्री झाली. त्यामुळे हा चित्रपट रविवारी एक कोटींच्या आसपास कमाई करण्याचा अंदाज आहे, पण त्याची आकडेवारी अद्याप समोर आलेली नाही. या चित्रपटाचे बजेट १० कोटी रुपये होतं. २०१८ मध्ये प्रदर्शित झाल्यावर या चित्रपटाने फक्त तीन कोटी रुपयांची कमाई केली होती. पुन्हा प्रदर्शित केल्यावर दोन दिवसांत चित्रपटाने एक कोटी कमावले आहेत, प्रेक्षकांचा असाच प्रतिसाद मिळत राहिल्यास हा चित्रपट आणखी चांगली कमाई करेल, असा अंदाज आहे.
दाक्षिणात्य चित्रपट आवडतात, मग तुम्ही बघितलेत का हे सस्पेन्स-थ्रिलर सिनेमे? OTTवर आहेत उपलब्ध
लैला व कैस यांची लव्ह स्टोरी या चित्रपटात दाखवण्यात आली आहे. यामध्ये सुमित कौल, साहिबा बाली, दुवा भट्ट, अबरार काझी या कलाकारांनी महत्त्वपूर्ण भूमिका साकारल्या होत्या. ‘लैला मजनू’ हा चित्रपट झी ५ या ओटीटी प्लॅटफॉर्मवर उपलब्ध आहे.
