“माझ्या दोन्ही मुलांना…”, माधुरी दीक्षितने पतीला ‘या’ गोष्टीचं दिलं श्रेय, आठवण सांगत म्हणाली, “अमेरिकेत असताना…”

डॉ. श्रीराम नेने त्यांच्या युट्यूब तसेच इन्स्टाग्रामवर नेहमीच हेल्दी पदार्थांच्या पाककृती शेअर करत असतात. आपल्या दोन्ही मुलांमध्ये वडिलांमुळे स्वयंपाकाची आवड निर्माण झाल्याचं माधुरीने या व्हिडीओमध्ये सांगितलं आहे. लहानपणापासूनच अरिन आणि रायनमध्ये वडिलांना पाहून कुकिंगची आवड निर्माण झाली होती. याशिवाय एके दिवशी परदेश दौऱ्याहून परतल्यावर अरिनने संपूर्ण कुटुंबासाठी कसं जेवण बनवलं होतं, याची खास आठवण ‘धकधक गर्ल’ने या व्हिडीओमध्ये सांगितली आहे.

माधुरीचा धाकटा मुलगा रायनने यावेळी सांगितलं की, त्याचं शिक्षण परदेशात झाल्याने त्याला स्वयंपाक करण्यासह सगळी दैनंदिन कामं स्वतंत्रपणे करता येऊ लागली. तर, माधुरी काही वर्षांपूर्वीची आठवण सांगताना म्हणाली, “मला आठवतंय डेन्व्हरमध्ये ( अमेरिकेत ) आमच्या घरी एक मदतनीस होती. मी सकाळी उठले आणि मला किचनमध्ये कसला तरी आवाज ऐकू आला. खाली उतरल्यावर पाहिलं की रायन त्या मदतनीसला सांगून त्याला आवडतील अशी अंडी बनवून घेत होता. अंड्यांमध्ये दूध घाला आणि नंतर ते फेटून घ्या…असं रायननेच त्यांना सांगितलं. बाबाला पाहून त्याच्यामध्ये ती स्वयंपाकाची आवड निर्माण झालीये. तेव्हा तो अगदी ३ वर्षांचा होता.”

माधुरी मोठ्या मुलाबद्दल म्हणाली, “एकदा अरिनने रात्री ९.३० वाजता स्वयंपाक करायला सुरुवात केली आणि अगदी तासाभरात १०.३० ला त्याने सॅलडपासून सगळं जेवण बनवलं होतं.” यावर अरिन हसून म्हणाला, “हो कारण, तुम्ही त्यावेळी पदेशातून ट्रॅव्हल करून आला होता आणि खूप थकला होतात. फक्त जेवणासाठी उठलात आणि परत झोपी गेलात.”

“प्रत्येक कुटुंबात एक अशी क्रिया असते जी त्यांना जवळ आणते आणि आपल्या नेने कुटुंबाचे बंध स्वयंपाकामुळेच आणखी घट्ट झाले आहेत.” असं सांगत श्रीरान नेने यांनी आपल्या भावना व्यक्त केल्या.