९० च्या दशकातील लोकप्रिय बॉलीवूड अभिनेत्री ममता कुलकर्णी सध्या खूप चर्चेत आहे. त्याचं कारण म्हणजे तिने आता प्रयागराजमध्ये सुरू असलेल्या महाकुंभ मेळ्यादरम्यान संन्यास घेतला. ती किन्नर आखाड्याची महामंडलेश्वर झाली आहे. संन्यासानंतर ममताचे नाव बदलण्यात आले. यापुढे ती श्री यमाई ममता नंद गिरी या नावाने ओळखली जाईल.
५२ वर्षीय ममता कुलकर्णीचं जन्म नाव पद्मावती कुलकर्णी आहे. तिने सिनेसृष्टीत येण्यासाठी नाव बदललं होतं. ममताचा जन्म २० एप्रिल १९७२ रोजी मुंबईत एका मध्यमवर्गीय मराठी ब्राह्मण कुटुंबात झाला. तिचे कुटुंब वर्सोवा भागात वास्तव्यास होते. मुंबईतील सेंट जोसेफ कॉन्व्हेंट हायस्कूलमधून शालेय शिक्षण पूर्ण करणाऱ्या ममताला अभिनयात फार रस नव्हता. मात्र तिने या क्षेत्रात यावं अशी तिच्या आईची इच्छा होती. ममता व तिची बहीण मुलिना कुलकर्णी दोघीही अभिनयक्षेत्रात आल्या.
ममता कुलकर्णीचे चित्रपट
ममताने १९९१ मध्ये ‘नानबर्गल’ या तमिळ चित्रपटातून करिअरला सुरुवात केली. त्याच वर्षी तिचा पहिला हिंदी चित्रपट ‘मेरा दिल तेरे लिए’ प्रदर्शित झाला होता. ममताने तिच्या करिअरमध्ये एकूण ३४ चित्रपट केले. ‘आशिक आवारा’, ‘करण अर्जुन’, ‘नसीब’, ‘सबसे बडा खिलाडी’, ‘क्रांतीवीर’, ‘आंदोलन’, ‘छुपा रुस्तम’, ‘घातक’, ‘वक्त हमारा है’, ‘बाजी’ हे तिचे गाजलेले चित्रपट आहेत. तिने हिंदीबरोबरच मराठी, तमिळ, बंगाली चित्रपटही केले. तिचा शेवटचा चित्रपट ‘कभी तुम कभी हम’ २३ वर्षांपूर्वी २००२ मध्ये प्रदर्शित झाला होता.
ममता कुलकर्णीची संपत्ती किती?
डीएनएने मीडिया रिपोर्ट्सनुसार दिलेल्या माहितीनुसार, ममता कुलकर्णीची एकूण संपत्ती अंदाजे ८५ कोटी रुपये आहे. बॉलीवूडपासून दूर गेल्यानंतरही ती आर्थिकदृष्ट्या सक्षम होती. २००० मध्ये तिने इंडस्ट्री सोडली, त्यानंतर ती दुबईला निघून गेली. महिनाभरापूर्वी भारतात येण्याआधी ती दुबईत राहत होती. ती २५ वर्षांनी २०२४ मध्ये मुंबईत आली, तर मागील कुंभमेळ्यानंतर दुसऱ्यांदा भारतात आली.
ममता कुलकर्णी तिच्या चित्रपटांपेक्षा वैयक्तिक आयुष्यामुळे जास्त चर्चेत राहिली. तिचे नाव ड्रग्ज प्रकरणात आले होते. तसेच ड्रग्ज प्रकरणात आरोप झालेल्या विकी गोस्वामीबरोबर ती रिलेशनशिपमध्ये होती. त्यांनी लग्न केल्याच्या चर्चा होत्या, मात्र ममताने त्या फेटाळल्या. विकीच्या प्रेमात होते, पण लग्न केलं नाही, असं तिने सांगितलं.
