सुप्रसिद्ध बॉलीवूड चित्रपट निर्माती मेघना गुलजार सध्या तिच्या आगामी ‘साम बहादूर’ चित्रपटामुळे चर्चेत आहे. या चित्रपटात विकी कौशल मुख्य भूमिकेत आहे. हा चित्रपट १ डिसेंबर रोजी सिनेमागृहांमध्ये प्रदर्शित होणार आहे. विकी कौशल आणि दिग्दर्शक मेघना गुलजार त्यांच्या चित्रपटाचे जोरदार प्रमोशन करत आहेत. दोघांनी ‘द इंडियन एक्स्प्रेस’चा विशेष कार्यक्रम ‘एक्स्प्रेस अड्डा’मध्ये हजेरी लावली. यावेळी मेघनाने ‘छपाक’ फ्लॉप झाला त्यावरही भाष्य केलं.
मेघना गुलजारने दीपिका पदुकोण जवाहरलाल नेहरू विद्यापीठात गेल्यानंतर झालेल्या वादावर आपली प्रतिक्रिया दिली आहे. दीपिकाच्या जेएनयू भेटीचा परिणाम तिच्या ‘छपाक’ या चित्रपटावर झाल्याचे मेघना गुलजारने मान्य केले आहे. मेघना म्हणाली, “माझे उत्तर खूप स्पष्ट आहे. होय, अर्थातच दीपिका पदुकोणच्या जेएनयू भेटीचा चित्रपटावर परिणाम झाला. कारण विषय अॅसिड हल्ल्यावरून हिंसाचारापर्यंत पोहोचला. चर्चा कुठल्या कुठे पोहोचली, त्यामुळे साहजिकच त्याचा चित्रपटावर परिणाम झाला. यात शंका नाही.”
दीपिका पदुकोण आणि जेएनयू वाद नेमका काय?
२०२० मध्ये दीपिका पदुकोण तिच्या ‘छपाक’ चित्रपटाच्या प्रमोशनसाठी दिल्लीत आली होती. तेव्हा तिने जवाहरलाल नेहरू विद्यापीठाला (जेएनयू) भेट दिली. त्यावेळी जेएनयूमधील विद्यार्थी नागरिकत्व दुरुस्ती कायद्याविरोधात आंदोलन करत होते. त्या विद्यार्थ्यांबरोबर दीपिका उभी राहिली होती, तिचे फोटो व व्हिडीओ व्हायरल झाल्यानंतर तिच्या जेएनयू भेटीवर जोरदार टीका झाली होती. त्याचा परिणाम तिच्या ‘छपाक’ चित्रपटाच्या कमाईवरही झाला होता.
लक्ष्मी अग्रवालचा बायोपिक ‘छपाक’
५० कोटींच्या बजेटमध्ये बनलेल्या या चित्रपटाने बॉक्स ऑफिसवर केवळ ५५.४४ कोटींची कमाई केली होती. ‘छपाक’ चे दिग्दर्शन मेघना गुलजारने केले होते. या चित्रपटात दीपिकाबरोबर विक्रांत मेस्सी होता. ‘छपाक’ हा चित्रपट अॅसिड हल्ल्यातून बचावलेल्या लक्ष्मी अग्रवालचा बायोपिक होता. लक्ष्मीवर २००५ मध्ये नईम खान उर्फ गुड्डू नावाच्या तरुणाने दिल्लीच्या खान मार्केटमध्ये अॅसिड फेकले होते.
