बॉलीवूड अभिनेत्री परिणीती चोप्रा आणि आम आदमी पार्टीचे नेते राघव चड्ढा रविवारी (२४ सप्टेंबर रोजी) विवाहबंधनात अडकले. त्यांनी उदयपूर येथील द लीला पॅलेसमध्ये शाही सोहळ्यात लग्नगाठ बांधली. या लग्नातील फोटो आता समोर येत आहेत. परिणीती व राघव यांच्या लग्नात आदित्य ठाकरे यांनीही हजेरी लावली होती. या सोहळ्यातील फोटो आदित्य यांनी शेअर केले आहेत.
आदित्य ठाकरे राघव व परिणीतीच्या लग्नासाठी शनिवारी उदयपूरला गेले होते. या लग्नाला हजेरी लावणाऱ्या काही मोजक्या राजकीय नेत्यांपैकी आदित्य ठाकरे हे एक होते. आता त्यांनी लग्नातील फोटो शेअर केले आहेत. यात आदित्य यांनी लग्नाची थीम असलेल्या ऑफ व्हाइट रंगाचा कुर्ता व त्यावर मल्टिकलर प्रिंटेड जॅकेट घातलं आहे. “तुम्हा दोघांचे हार्दिक अभिनंदन. तुम्हाला आयुष्यभर आनंद, उत्तम आरोग्य आणि प्रेम मिळो ही सदिच्छा,” असं कॅप्शन देत आदित्य यांनी फोटो शेअर केले आहेत.
परिणीती चोप्रा व राघव चड्ढा दोघांनी मे महिन्यात दिल्लीत साखरपुडा केला होता. त्यावेळी अनेक राजकीय नेत्यांनी हजेरी लावली होती. त्यानंतर त्यांनी आता लग्नगाठ बांधली. त्यांच्या लग्नात दिल्लीचे मुख्यमंत्री अरविंद केजरीवाल आणि पंजाबचे मुख्यमंत्री भगवंत मान हेदेखील उपस्थित होते.
