“त्याने मला ओळखही दिली नाही”, कपिल शर्माच्या वागणूकीवर ज्येष्ठ अभिनेत्याची नाराजी; म्हणाले, “संपूर्ण देश माझ्या पाया…”

तो जवळजवळ २० मिनिटे…

मुकेश खन्ना यांनी नुकतीच ‘अनसेन्सॉर विथ शार्दुल’ या युट्यूब चॅनेलला मुलाखत दिली. या मुलाखतीत कपिल शर्माबद्दल मुकेश खन्ना म्हणाले, “मला कपिल शर्मा का आवडत नाही आणि का मला त्याच्या शोमध्ये जाण्यास नकार दिला. याचे एक कारण आहे. ती गोष्ट सर्वांचे डोळे उघडणारी आहे. गोल्ड पुरस्कार सोहळ्यात मला एक पुरस्कार देण्यात आला होता. त्या पुरस्कार सोहळ्यात कपिल शर्मादेखील उपस्थित होता. तो त्यावेळी इंडस्ट्रीमध्ये नवीन आला होता. त्यालादेखील पुरस्कार देण्यात आला होता. त्यावेळी तो कॉमेडी सर्कस हा शो करायचा. तो आला आणि माझ्या शेजारी बसला. त्याने मला ओळखही दिली नाही. तो जवळजवळ २० मिनिटे तिथे बसला होता. पुरस्कारासाठी जेव्हा त्याचे नाव घेण्यात आले तेव्हा तो पुरस्कार घेऊन गेला.”

पुढे मुकेश खन्ना यांनी अनेक कलाकारांना सार्वजनिक ठिकणी भेटल्याची उदाहरणे दिली. मुकेश खन्ना म्हणाले, “मी अमिताभ बच्चन यांना अनेकदा विमानात भेटलो आहे. मी लंडनहून परत येत होतो, त्याचवेळी अमिताभ बच्चनदेखील लंडनहून परतत होते. आमची विमानात भेट झाली. आम्ही एकमेकांना तसे ओळखत नाही. पण त्यांना माहित होते आम्ही दोघेही कलाकार आहे. आम्ही दोघे एकमेकांशी बोललो.” पुढे ते म्हणाले, एकदा हृतिक रोशन व मी विमानतळावर उभे होतो. तो मला भेटला आणि म्हणाला की विमानतळावर दोन सुपरस्टार उभे आहेत. जरी तुम्ही एखाद्या व्यक्तीला कधीही भेटला नसाल तरी तुम्ही त्यांना पाहिल्यानंतर त्यांच्याशी बोलता, हे संस्कार आहेत. इंडस्ट्रीमधील ही बंधुता आहे. पण, कपिल शर्मामध्ये जरासुद्धा शिष्टाचार नाही”, असे परखड वक्तव्य मुकेश खन्ना यांनी केले.

मुकेश खन्ना यांना महाभारत या मालिकेतील भीष्म या भूमिकेतून मोठी लोकप्रियता मिळाली. सध्या ते युट्यूबवर अनेक कलाकारांच्या मुलाखती घेताना दिसतात. दरम्यान, कपिल शर्मा ‘द ग्रेट इंडिया कपिल शो’ या शोमध्ये दिसत आहे. कपिल शर्माचा चाहतावर्ग मोठा आहे.