बॉलिवूड अभिनेता अजय देवगणच्या ‘मैदान’ या चित्रपटाची बरेच महिने चर्चा आहे. अजय देवगणचे चाहतेही खूप दिवसांपासून या चित्रपटाची वाट पाहत आहेत. आधी करोनामुळे चित्रपटाच्या प्रदर्शनाची दोन वर्षे वाट पाहावी लागली. निर्माते हा चित्रपट जून २०२२ मध्ये रिलीज करणार होते. मात्र तेव्हा त्यांनी हा चित्रपट प्रदर्शित केला नाही. आता या चित्रपटाची नवीन रिलीज डेट समोर आली आहे.
आणखी वाचा : अन्नू कपूर यांची ऑनलाईन फसवणूक, केवायसी अपडेट करण्याच्या नावाखाली घातला लाखो रुपयांचा गंडा
यापूर्वी ‘मैदान’ ११ डिसेंबर २०२० रोजी मोठ्या पडद्यावर प्रदर्शित होणार होता परंतु करोनामुळे त्याची रिलीज डेट १३ ऑगस्ट २०२१ करण्यात आली. त्यानंतर काही कारणाने या चित्रपटाच्या प्रदर्शनाची तारीख पुढे ढकलून ती १५ ऑक्टोबर २०२१ करण्याचा निर्णय घेण्यात आला. पण तेव्हाही हा चित्रपट प्रदर्शित केला गेला नाही आणि पुन्हा एकदा रिलीजची तारीख बदलली गेली. हा चित्रपट ३ जून २०२२ रोजी प्रदर्शित होणार होता. परंतु त्यावेळीही या चित्रपटाची रिलीज डेट पुढे धाकलण्यात आली.
अनेकवेळा चित्रपटाच्या प्रदर्शनाची तारीख बदलल्यानंतर आता पुन्हा एकदा या चित्रपटाची नवी तारीख जाहीर करण्यात आली आहे. आता हा चित्रपट पुढील वर्षी फेब्रुवारीमध्ये प्रदर्शित होणार आहे. १७ फेब्रुवारी २०२३ ही या चित्रपटाच्या प्रदर्शनाची नवी तारीख आहे. ही बातमी आल्यानंतर या चित्रपटासाठी आणखीन वाट पाहावी लागणार असल्याने अजय देवगणच्या चाहत्यांची निराशा होणार आहे. अजय देवगणचा हा चित्रपट खूप मोठ्या प्रमाणावर प्रदर्शित होणार आहे. निर्माते हा चित्रपट चार भाषांमध्ये प्रदर्शित करतील. हा चित्रपट हिंदीसोबतच तमिळ, तेलगू आणि मल्याळम भाषांमध्येही प्रदर्शित होणार आहे.
आणखी वाचा : “मेरा नाम विजय साळगांवकर और ये मेरा कन्फेशन…”, ‘दृश्यम 2’ चा उत्कंठावर्धक टीझर प्रदर्शित
अजय देवगणच्या आगामी चित्रपटांच्या यादीत ‘थँक गॉड’, ‘भोला’, ‘दृश्यम २’ या चित्रपटांचा समावेश आहे. हे सर्व चित्रपट एकापाठोपाठ एक प्रदर्शित होणार आहेत. त्यामुळे या बॅक टू बॅक रिलीजमुळे ‘मैदान’च्या रिलीज डेटमध्ये सारखा बदल येत असल्याचे समोर आले आहे.
