बॉलिवूड अभिनेत्री प्रियांका चोप्रा सध्या भारतात आहे. ती तिचा पती निक जोनस आणि मुलगी मालतीबरोबर ‘सिटाडेल’ या सीरिजच्या प्रमोशनसाठी इथं आली आहे. काही दिवसांपूर्वीच सीरिजचा ट्रेलर प्रदर्शित झाला होता. यामध्ये प्रियांका दमदार अॅक्शन अवतारात दिसणार आहे. प्रियांकाने अलीकडेच बॉलिवूडमध्ये तिच्यासोबत होत असलेल्या भेदभावाचा खुलासा केला, त्यानंतर अनेक लोक तिच्या समर्थनात आले होते.
दरम्यान, प्रियांकाने अंबानी कुटुंबाने आयोजित केलेल्या कार्यक्रमाला हजेरी लावली. यावेळी प्रियांका चोप्राने पती निकसोबतचे काही फोटो सोशल मीडियावर पोस्ट केले आहेत. ज्यामध्ये प्रियांका आणि निक एका ऑटोरिक्षाजवळ पोज देताना दिसत आहेत. हे फोटो शेअर करत प्रियांकाने कॅप्शनमध्ये लिहिले की, “माझा कायमचा जोडीदार निक जोनाससोबत डेट नाईट.” या फोटोंवरूनच अभिनेता आणि समीक्षक कमाल राशीद खानने प्रियांकाला टोला लगावला आहे. प्रियांकाच्या या वागण्यामुळे निक जोनास एक दिवस तिला सोडून जाईलं, असं त्याने म्हटलंय.
“मला भीती वाटते की, एके दिवशी हा मुलगा प्रियंका चोप्रासोबत अशी अॅक्टिंग करून कंटाळेल आणि म्हणेल की मॅडम मी वैतागलोय, आता मला जाऊ द्या,” असं ट्वीट केआरकेने केलंय.
केआरकेने प्रियांकावर टीका केली असली तरी तिच्या फोटोंवर चाहते मात्र लाइक्स व कमेंट्सचा वर्षाव करत आहेत.
