“आम्ही सलमानला रात्रभर…”, ‘तेनू लेके’ गाण्याच्या शूटिंगची आठवण सांगत दिग्दर्शक म्हणाले, “सकाळी ५ वाजता…”

“तो सकाळी ५ वाजता शूटिंगसाठी येऊ शकत नाही”

निखिल अडवाणींनी ‘माशाबल इंडिया’ला नुकतीच मुलाखत दिली. या मुलाखतीत सलमान खानबरोबर काम करण्याचा अनुभव सांगत निखिल अडवाणींनी तेनू लेके या गाण्याच्या शूटिंगची आठवण सांगत म्हटले, “आम्ही सलमानला सकाळी ५ वाजता शूटिंगसाठी येण्यास सांगितले. त्यावर त्याने म्हटले की, त्याला रात्रभर जागे राहावे लागेल. आम्ही सलमानला रात्रभर जागे ठेवले. कारण- त्याने आम्हाला सांगितले होते की, तो सकाळी ५ वाजता शूटिंगसाठी येऊ शकत नाही. माझ्याबरोबर रात्रभर जागे राहा. मी सकाळी १० वाजता झोपतो. त्यामुळे आम्ही त्याच्याबरोबर बसलो, त्याला शूटसाठी घेऊन गेलो आणि शूटिंग पूर्ण केले. त्यानंतर तो झोपला.”

याबरोबरच अर्जुन कपूर या चित्रपटात असिस्टंट म्हणून काम करत होता. त्याने चुकीच्या ठिकाणी कॅमेरा पाठविला होता, अशी आठवणदेखील निखिल अडवाणींनी सांगितली.

गोविंदादेखील सेटवर उशिरा येण्यासाठी ओळखला जातो. मात्र, ‘सलाम-ए-इश्क’वेळी त्याला लोकांना चुकीचे ठरवायचे होते. त्यामुळे तो वेळेत येत असे. त्याने त्याच्या वागण्यात बदल केला होता, अशी आठवण निखिल अडवाणींनी सांगितली.

दरम्यान, या चित्रपटात सलमान खान, गोविंदा यांच्याबरोबरच प्रियांका चोप्रा, जुही चावला, अनिल कपूर हे कलाकारही मुख्य भूमिकांत दिसले होते. निखिल अडवाणींच्या ‘कल हो ना हो’च्या यशानंतर ‘सलाम-ए-इश्क’ चित्रपट बनवला गेला. मात्र, या चित्रपटाला अपेक्षित यश मिळू शकले नाही.