अजय देवगण आणि काजोल यांची मुलगी न्यासा देवगणने फिल्मी दुनियेत पाऊल ठेवण्यापूर्वीच चर्चेत राहायला सुरुवात केली आहे. न्यासा सोशल मीडियावर खूप लोकप्रिय असलेल्या स्टारकिड्सपैकी एक आहे. अनेकदा ती विविध पार्ट्यांना हजेरी लावताना दिसते. बऱ्याचदा तिला तिने परिधान केलेल्या कपड्यांमुळे ट्रोलही केलं जातं. आता नुकतेच तिच्या न्यू इअर पार्टीचे फोटो व्हायरल झाले आहेत. या फोटोत न्यासाचा लूक बघून पुन्हा एकदा ती नेटकऱ्यांच्या निशाण्यावर आली आहे.
न्यासाच्या दिसण्यामध्ये काही दिवसांपूर्वी अचानक मोठा बदल झाला आहे. तिचा हा बदललेला लूक म्हणजे सर्वांसाठीच सरप्राईज होतं. तर सध्या अजय देवगण आणि काजोल यांची लेक न्यासा दुबईत आहे. दुबईत राहून तिने नवीन वर्षाचे स्वागत केले. या खास प्रसंगी ती तिच्या मित्रांसोबत खूप एन्जॉय करताना दिसली. न्यासाचा मित्र ओरहान आणि न्यासाच्या फॅन पेजने त्यांच्या इन्स्टाग्राम हँडलवर या पार्टीचे काही फोटो शेअर केले आहेत. पण या फोटोंमध्ये न्यासाचा लूक पाहून चाहते आश्चर्यचकित झाले आहेत.
नवीन वर्षाच्या पार्टीदरम्यान न्यासाने काळ्या रंगाचा डीप नेक ड्रेस परिधान केला होता. न्यासाच्या या बोल्ड लूकवर तिच्या चाहत्यांच्या नजरा खिळल्या होत्या. मात्र, अनेकांना तिचा हा बोल्ड अंदाज आवडला नाही आणि त्यांनी तिच्यावर टिका करायला सुरुवात केली.
हेही वाचा : “लोक वाईट बोलतात याचा अर्थ न्यासा…”; लेकीला ट्रोल केलं जाण्याबद्दल काजोलने सोडलं मौन
या फोटोंवर कमेंट करताना एका नेटकऱ्याने लिहिले की, “या अशा पोज देऊन फोटो काढल्यानंतर ती तिच्या आई-वडिलांच्या नजरेला नजर कशी मिळवू शकते हेच कळत नाही.” तर दुसऱ्या नेटकऱ्याने लिहिलं, “तिने तिच्या आई-वडिलांची अब्रू पार धुळीला मिळवली आहे.” तर आणखी एका नेटकऱ्याने कमेंट करत लिहिलं, “ही १ टक्काही तिच्या आईसारखी नाही.” आणखी एक नेटकरी म्हणाला, “ही पूर्णपणे नशेत आहे.” न्यासाचे न्यू इअर पार्टीचे हे फोटो तुफान व्हायरल होत आहेत.
