बॉलिवूड अभिनेत्री तब्बू ही गेले कित्येक वर्षं चित्रपटसृष्टीत काम करत आहे. तब्बल ३ दशकांपासून तब्बू रसिकांच्या मनावर अधिराज्य गाजवत आहे. आजच्या काळातील कित्येक अभिनेत्रींनाही तिने कामाच्या बाबतीत मागे टाकलं आहे. चित्रपटसृष्टीत स्वतःचं स्थान निर्माण करण्यासाठी तिलाही प्रचंड मेहनत घ्यावी लागली होती. चित्रपटसृष्टीतील भेदभाव आणि कंपूशाहीला तब्बूदेखील बळी पडल्याचं तिने एकदा स्पष्ट केलं होतं.
एका चित्रपटातून तब्बूला बाहेरचा रस्ता दाखवण्यात आला होता तेदेखील आमिर खानच्या सांगण्यावरुन. याबद्दल मध्यंतरी एका मुलाखतीदरम्यान तिने खुलासा केला होता. १९९९ मध्ये प्रदर्शित झालेल्या ‘मन’ चित्रपटात प्रथम तब्बूला घेतलं होतं, पण नंतर काही कारणास्तव तिला यातून काढून मनीष कोईरालाला घेण्यात आलं. २००१ मध्ये दिलेल्या एका मुलाखतीमध्ये तब्बूने याविषयी खुलासा केला होता.
तब्बू म्हणाली, “मला आमिर खानबरोबर एक चित्रपट करायला नक्कीच आवडला असता. आम्ही ‘मन’ या चित्रपटासाठी एकत्र फोटोशूटही केलं होतं. नंतर कॅमेराच्यामागे नेमकं काय घडलं याचा मला काहीच अंदाज नाही. हे मनोरंजनसृष्टीतील बहुतेक सगळ्याच अभिनेत्रींच्या बाबतीत घडतं.” फक्त आमिरच नव्हे तर गोविंदाच्याही एका चित्रपटातून तब्बूला काढलं होतं. गोविंदाच्या ‘कुवारा’ चित्रपटात ऐनवेळी तब्बूच्या ऐवजी उर्मिला मातोंडकरला घेतलं होतं.
आणखी वाचा : ‘जवान’चं चित्रीकरण पूर्ण, शाहरुख खानने रचला नवा विक्रम; लवकरच येणार चित्रपटाचा टीझर
तब्बूने नंतर आमिर खानबरोबर ‘फना’ चित्रपट सोडला तर कशातच काम केलं नाही, अन् गोविंदासह काम करायची संधी कधीच तब्बूला मिळाली नाही. नुकतंच तब्बू अजय देवगणसह ‘दृश्यम २’ आणि ‘भोला’ या चित्रपटात दिसली. दोन्ही चित्रपटांनी बॉक्स ऑफिसवर जबरदस्त कमाई केली. आता तब्बू विशाल भारद्वाज यांच्या ‘खुफिया’ आणि रीया कपूरच्या ‘द क्रू’ या आगामी चित्रपटात दिसणार आहे.
