परिणीती चोप्रा आणि राघव चड्ढा यांचा शाही विवाहसोहळा २४ सप्टेंबरल उदयपूरमध्ये पार पडला. दोघांच्या लग्नाचे फोटो सोशल मीडियावर प्रचंड व्हायरल झाले होते. या जोडप्याच्या लग्नातील सुंदर फोटोंवर बॉलीवूड सेलिब्रिटींसह राजकीय क्षेत्रातील दिग्गजांनी कौतुकाचा वर्षाव केला होता. परिणीती-राघवच्या लग्नानंतर दोघेही हनिमूनला कुठे जाणार याची चर्चा रंगली होती. परंतु, काही दिवसांनी चित्रपटाच्या शूटिंगचं व्यग्र वेळापत्रक आणि संसदेच्या हिवाळी अधिवेशनमुळे राघव-परिणीतीने बाहेर फिरायला जायची योजना रद्द केल्याचं वृत्त समोर आलं.
हेही वाचा : कतरिना कैफने टॉवेल गुंडाळून केली जबरदस्त अ‍ॅक्शन, ‘टायगर ३’मधील ‘तो’ सीन इंटरनेटवर व्हायरल, नेटकरी म्हणाले…
परिणीती चोप्रा सोशल मीडियावर प्रचंड सक्रिय असते. लग्नानंतर ती पहिल्यांदाच मालदिव फिरायला गेली आहे. परंतु, मालदिवच्या निसर्गरम्य वातावरणाचा आनंद घेण्यासाठी परिणीती पती राघव चड्ढांबरोबर नव्हे तर तिच्या मैत्रिणींबरोबर ‘गर्ल्स ट्रिप’ला गेली आहे. मालदिवचं रिसॉर्ट, निळाशार समुद्रकिनारा याचे फोटो अभिनेत्रीने सोशल मीडियावर शेअर केले आहेत.
मालदिवचे फोटो पाहून हनिमूनच्या चर्चा रंगू नयेत याची परिणीतीने पूर्णपणे खबरदारी घेतली आहे. या फोटोंना “मी हनिमूनला आलेली नाही ही आमची गर्ल्स ट्रिप आहे” असं कॅप्शन अभिनेत्रीने दिलं आहे. शेअर केलेल्या फोटोंमध्ये परिणीतीच्या हातात कॉफीचा कप, लग्नाचा गुलाबी रंगाचा चुडा आणि सुंदर असा समुद्रकिनारा पाहायला मिळत आहे.
हेही वाचा : “त्याने चुकीच्या पद्धतीने हात लावला…”, मराठी अभिनेत्रीने सांगितला धक्कादायक अनुभव; म्हणाली, “त्या क्षणी…”
परिणीतीने अलीकडेच ‘लॅक्मे फॅशन वीक २०२३’मध्ये रॅम्पवॉक केला होता. याचे व्हिडीओ सोशल मीडियावर प्रचंड व्हायरल झाले होते. लग्नानंतर पहिल्यांदा वॉक करताना परिणीतीने पेस्टल रंगाची साडी, गळ्यात हार, कपाळावर कुंकू, हातात चुडा असा लूक केला होता. लवकरच अभिनेत्री ‘चमकिला’ आणि ‘लाइफ इन अ मेट्रो’ या चित्रपटांमध्ये झळकणार आहे.
