शाहरुख खान आणि दीपिका पदुकोण यांच्या ‘पठाण’ या चित्रपटाकडे सध्या सगळयांचंच लक्ष लागलं आहे. एकीकडे या चित्रपटावरून वाद होताना दिसतोय तर दुसरीकडे शाहरुखचे चाहते त्याला चार वर्षांनी मोठ्या पडद्यावर बघण्यासाठी फार उत्सुक आहेत. जगभरात या चित्रपटाचं ॲडव्हान्स बुकिंग सुरू झालं आहे आणि त्याला तुफान प्रतिसाद मिळत आहे. अशातच या चित्रपटाने प्रदर्शनाआधीच बड्या चित्रपटांचे रेकॉर्ड्स मोडायला सुरुवात केली आहे.
२५ जानेवारी रोजी ‘पठाण’ चित्रपट प्रदर्शित होणार आहे. या चित्रपटासाठी प्रेक्षक प्रचंड उत्सुक असलेले पाहायला मिळत आहेत. शाहरुखबद्दलची त्यांची क्रेझ आणि चित्रपटाबद्दलची त्यांची उत्सुकता ते ॲडव्हान्स बुकिंगच्या प्रतिसादातून दाखवत आहेत. आता या चित्रपटाने विक्रम नोंदवायला सुरुवात केली आहे. नुकताच या चित्रपटाने एस एस राजामौली यांच्या ऑस्करच्या शर्यतीत आलेल्या ‘आरआरआर’ या चित्रपटाचा रेकॉर्ड मोडला आहे.
आणखी वाचा : वादाच्या भोवऱ्यात अडकूनही ‘पठाण’चे ओटीटी अधिकार विकले ‘इतक्या’ कोटींना, आकडा ऐकून व्हाल थक्क
शुक्रवारी या चित्रपटाचा ॲडव्हान्स बुकिंगला भारतात सुरुवात झाली. आतापर्यंत ॲडव्हान्स बुकिंग मधून या चित्रपटाच्या पहिल्या दिवशीची २ लाख ६५ हजार तिकीटं विकली गेली आहेत. हा आकडा ‘आरआरआर’ या चित्रपटाच्या ॲडव्हान्स बुकिंगपेक्षाही जास्त आहे. ‘आरआरआर’च्या प्रदर्शनावेळी या चित्रपटाच्या पहिल्या दिवशीची १ लाख ५ हजार तिकीटं विकली गेली होती. आता त्याहून दुप्पट तिकीटं विकून शाहरुखच्या ‘पठाण’ या चित्रपटाने याबाबतीत ‘आरआरआर’ला मागे टाकलं आहे. त्याचप्रमाणे आज आणि उद्या या चित्रपटाचं ॲडव्हान्स बुकिंग सुरू राहील. त्यामुळे या दोन दिवसात हा चित्रपट ‘ब्रह्मास्त्र’चाही रेकॉर्ड मॉडेल असं बोललं जात आहे.
या चित्रपटातून शाहरुख मोठ्या ब्रेकनंतर मोठ्या पडद्यावर परतताना दिसणार आहे. यात शाहरुख खानबरोबर दीपिका पदुकोण प्रमुख भूमिकेत दिसणार आहे, तर अभिनेता जॉन अब्राहम याची या चित्रपटात नकारात्मक भूमिका आहे. सिद्धार्थ आनंद दिग्दर्शित या चित्रपटात सलमान खानही कॅमिओ करताना दिसणार आहे.
