प्रभासची मुख्य भूमिका असलेला ‘कल्की: २८९८ एडी’ या चित्रपटाने बॉक्स ऑफिसवर धुमाकूळ घातला आहे. आता या चित्रपटाने बॉक्स ऑफिसवर नवा विक्रम रचला असून आतापर्यंत सर्वात जास्त कमाई करणारा तो चौथा चित्रपट ठरला आहे. हा विक्रम करत ‘कल्की: २८९८ एडी’ या चित्रपटाने शाहरुख खानच्या ‘जवान’ चित्रपटाला मागे टाकले आहे.
नाग अश्विन दिग्दर्शित ‘कल्की: २८९८ एडी’ चित्रपट २७ जून २०२४ ला प्रदर्शित झाला आहे. प्रदर्शित झाल्याच्या ४० दिवसांनंतर सर्व भाषांमध्ये या चित्रपटाने भारतात ७४० कोटींची कमाई केली आहे. समोर आलेल्या रिपोर्टनुसार, कल्कीने हिंदी भाषेत ३५० कोटी रुपयांची कमाई केली आहे. तेलुगु भाषेत ३३५ कोटी रुपयांची कमाई केली आहे; तर तमिळ, मल्याळम आणि कन्नड भाषेत चित्रपटाने एकूण ७५ कोटींची कमाई केली आहे.
सर्वात जास्त कमाई करणारे पहिले तीन चित्रपट कोणते?
‘कल्की: २८९८ एडी’ चित्रपटाने बॉक्स ऑफिसवर मोठी कमाई करत चौथ्या क्रमांकावर मजल मारली आहे. पहिल्या क्रमांकावर प्रभासची मुख्य भूमिका असलेला ‘बाहुबली २’ हा चित्रपट आहे. या चित्रपटाने १,४१७ कोटी रुपयांची कमाई केली होती, तर ‘केजीएफ: चाप्टर २’ या चित्रपटाने १००१ कोटी रुपयांची कमाई केली होती; तर ‘आरआरआर’ या चित्रपटाने ९१६ कोटी रुपयांची कमाई केली होती. हा चित्रपट बॉक्स ऑफिसवर सर्वात जास्त कमाई करणाऱ्या यादीत तिसऱ्या क्रमांकावर आहे.
हेही वाचा: अनंत अंबानी-राधिका मर्चंटने हनिमूनसाठी निवडलं पॅरिसमधील ‘हे’ रिसॉर्ट, किंमत वाचून व्हाल हैराण
दरम्यान, प्रभासच्या या चित्रपटाने गेल्या महिन्यात संपूर्ण जगभरात बॉक्स ऑफिसवर १००० कोटींचा टप्पा गाठला होता. ‘कल्की : २८९८ एडी’ चित्रपट नाग अश्विन यांनी दिग्दर्शित केला असून, या चित्रपटात दीपिका पदुकोण, कमल हासन, अमिताभ बच्चन, प्रभास, दिशा पटानी, मृणाल ठाकूर, दुलकिर सलमान, विजय देवरकोंडा या दिग्गज कलाकारांनी आपल्या अभिनयाने प्रेक्षकांची मने जिंकून घेतली आहेत. हा चित्रपट विज्ञान आणि पौराणिक कथेचा योग्य संगम असल्याचे म्हटले जात आहे. विष्णूच्या दहाव्या अवताराची ही गोष्ट आहे. या चित्रपटाचे जगभरातून कौतुक होताना दिसत आहे. आता ‘कल्की: २८९८ एडी’ हा चित्रपट आणखी किती कमाई करणार, हे पाहणे महत्त्वाचे ठरणार आहे.
© IE Online Media Services (P) Ltd