बॉलिवूड अभिनेता रणबीर कपूर व अभिनेत्री श्रद्धा कपूर मुख्य भूमिकेत असलेला ‘तू झुठी मैं मक्कार’ हा चित्रपट ८ मार्चला प्रदर्शित झाला. ट्रेलर प्रदर्शित झाल्यापासूनच या चित्रपटाची जोरदार चर्चा सुरू होती. या चित्रपटातील गाण्यांनाही चांगला प्रतिसाद मिळाला होता. या चित्रपटाच्या निमित्ताने पहिल्यांदाच स्क्रीन शेअर केलेल्या रणबीर व श्रद्धाची केमिस्ट्री पाहण्यासाठी चाहते उत्सुक होते.
रणबीर व श्रद्धाच्या ‘तू झूठी मैं मक्कार’ चित्रपटाने प्रदर्शनाच्या दिवशी १५.७३ कोटींचा गल्ला जमवला. होळी आणि धुळवडीच्या सुट्ट्यांमुळे या चित्रपटाला फायदा झाल्याचं दिसून आलं.तर आता प्रदर्शनाच्या सहाव्या दिवशीही या चित्रपटाने चांगला गल्ला जमवला आहे.
आणखी वाचा : Video: “कोण तो स्टॅण्ड…” चारचौघात राखी सावंतने चुकीचं उच्चारलं ‘बिग बॉस १६’ विजेत्याचं नाव, व्हिडीओ व्हायरल
प्रदर्शनाच्या पहिल्या दोनच दिवसांत रणबीर-श्रद्धाच्या चित्रपटाने २६.०७ कोटींची कमाई केली होती. तर या चित्रपटाची यशस्वी घोडदौड कायम आहे. काल हा चित्रपट प्रदर्शित होऊन सहा दिवस झाले आणि सहाव्या दिवशी या चित्रपटाने चांगलीच कमाई केली. या चित्रपटाने काल ६.०५ कोटींची कमाई केली. तर आतापर्यंत या चित्रपटाने एकूण ७६.२९ कोटींची घसघशीत कमाई केली आहे. तर वीकेएण्डला हा चित्रपट आणखी कमाई करण्याची अपेक्षा वर्तविण्यात येत आहे.
या चित्रपटामध्ये रणबीर आणि श्रद्धासह डिंपल कपाडिया, बोनी कपूर आणि कॉमेडियन अनुभव सिंग बस्सी हे कलाकारही महत्त्वपूर्ण भूमिकेत आहेत. अभिनेता म्हणून बोनी कपूर यांचा हा पहिलाच चित्रपट आहे.
