रणबीर कपूर सध्या त्याच्या कामामध्ये व्यग्र आहे. वडील झाल्यानंतर तो काही दिवस कामांमधून ब्रेक घेणार असल्याचं बोललं जात होतं. मात्र रणबीर त्याच्या आगामी चित्रपटांचं चित्रीकरण करत आहे. आलिया भट्ट व लेकीला पुरेसा वेळ देत तो त्याचं काम करत आहे. ‘एनिमल’ या चित्रपटाच्या चित्रीकरणामध्ये रणबीर व्यग्र आहे. या चित्रपटाच्या चित्रीकरणादरम्यानचाच रणबीरचा एक व्हिडीओ सध्या सोशल मीडियावर वेगाने व्हायरल होत आहे.
पंजाबमध्ये रणबीर या चित्रपटाचं चित्रीकरण करत होता. तेथील चित्रीकरण संपल्यानंतर ‘एनिमल’च्या संपूर्ण टीमने जोरदार पार्टी केली. यावेळी रणबीरही तिथे उपस्थित होता. त्याने या पार्टीमध्ये अगदी धमाल केली. रणबीरचे पार्टीमधील काही व्हिडीओ सोशल मीडियावर तुफान व्हायरल झाले आहेत.
या व्हिडीओमध्ये रणबीर बॉलिवूड गाण्यांवर डान्स करताना दिसत आहे. तर दुसऱ्या व्हिडीओमध्ये छय्या छय्या या गाण्यावर अगदी जमिनीवर बसून नाचत आहे. रणबीरच्या या व्हिडीओला चाहत्यांची अधिकाधिक पसंती मिळताना दिसत आहे. रणबीरबरोबरच या व्हिडीओमध्ये त्याच्या चित्रपटाची इतरही टीम नाचत आहे.
रणबीरला डान्स करताना पाहून त्याची टीम त्याला प्रोत्साहन देत आहे. तसेच रणबीरचा बदलता लूक या व्हिडीओमध्ये दिसत आहे. रणबीरची वाढलेली दाढी, बदलती शरीरयष्टी विशेष लक्षवेधी आहे. ‘एनिमल’ या चित्रपटात रणबीरसह अनिल कपूर, बॉबी देओल, रश्मिका मंदाना महत्त्वाच्या भूमिकेमध्ये दिसणार आहेत.
