Ranbir Kapoor And Alia Bhatt : आलिया भट्ट व रणबीर कपूर यांच्याकडे कलाविश्वातील आदर्श जोडी म्हणून पाहिलं जातं. एकमेकांना जवळपास ५ वर्षे डेट केल्यावर या दोघांनी एप्रिल २०२२ मध्ये लग्न केलं. ‘ब्रह्मास्त्र’ चित्रपटाच्या शूटिंगदरम्यान आलिया-रणबीरमध्ये खूप चांगली मैत्री झाली. यानंतर या मैत्रीचं रुपांतर पुढे प्रेमात झालं. या जोडप्यामध्ये जवळपास १० वर्षांचं अंतर आहे. आलिया रणबीरपेक्षा वयाने लहान असल्याने सुरुवातीच्या काळात यांना प्रचंड ट्रोल केलं गेलं. परंतु, आलिया रणबीरने सर्वांना आपलं बॉण्डिंग सिद्ध करून दाखवलं. नुकत्याच निखिल कामथला दिलेल्या मुलाखतीत अभिनेत्याने आपली बायको व वैवाहिक जीवनाबद्दल खुलासा केला आहे.
रिलेशनशिपमध्ये आल्यानंतर आलियाने स्वत:मध्ये अनेक बदल केल्याचं यावेळी रणबीरने मान्य केलं. अभिनेता म्हणतो, “आपलं लग्न झाल्यावर आपल्याला दैनंदिन जीवनातील अनेक गोष्टी व सवयींमध्ये बदल करावा लागतो. आपलं मूळ व्यक्तिमत्त्व बाजूला सारून विचार करावा लागतो. आलिया अन् माझं सुद्धा असंच आहे. प्रत्येक गोष्टीत एकमेकांना जास्तीत जास्त समजून घेण्याचा आमचा प्रयत्न असतो.”
हेही वाचा : Bigg Boss Marathi : प्रतीक्षा संपली! अखेर ‘बिग बॉस’च्या घराची पहिली झलक आली प्रेक्षकांसमोर… पाहा Inside व्हिडीओ
आलियाबद्दल काय म्हणाला रणबीर? ( Ranbir Kapoor And Alia Bhatt )
रणबीर पुढे म्हणाला, “याचं उदाहरण सांगायचं झालं तर, आलिया आधी खूप मोठ्या आवाजात बोलायची. माझे वडील सुद्धा आमच्याशी तसेच बोलायचे…त्या मोठ्या आवाजाचा मला त्रास व्हायचा. तिला सगळं समजल्यावर आलियाने मोठ्या आवाजात बोलणं पूर्णपणे कमी केलं. जेव्हा तुम्ही वयाची ३० वर्षे असे वागता अन् अचानक तुम्हाला कोणीतरी बदल करायला सांगितला तर निश्चित ती गोष्ट करणं अवघड जातं. पण, तिने माझ्यासाठी तो बदल केला.”
“आलिया माझ्यासाठी खूप बदलली…मी सुद्धा तिच्यासाठी बदलण्याचा प्रयत्न करत आहे. तिच्याकडे पाहून मला नेहमी आपणही बदललं पाहिजे…तिला हवं तसं वागलं पाहिजे असं वाटतं” असं रणबीर कपूरने सांगितलं. रणबीर-आलिया नेहमीच एकमेकांना खंबीरपणे साथ देताना दिसतात. या दोघांना राहा नावाची गोंडस मुलगी आहे. या जोडप्याप्रमाणे राहा सुद्धा सोशल मीडियावर प्रचंड लोकप्रिय आहे.
रणबीरबरोबर रिलेशनशिपमध्ये आल्यानंतर आलियाच्या वागण्या-बोलण्यात सुरुवातीपेक्षा प्रचंड बदल झाल्याचं तिच्या चाहत्यांना देखील जाणवलं होतं. आता मुलाखतींमध्ये देखील अभिनेत्री फार विचारपूर्वक बोलते. याकडे आलिया अतिशय सकारात्मकतेने पाहते व याचं संपूर्ण श्रेय आपल्या नवऱ्याला देत असते.
दरम्यान, रणबीर कपूर शेवटचा ‘अ‍ॅनिमल’ मध्ये झळकला होता. त्याच्याबरोबर या चित्रपटात रश्मिका मंदाना, बॉबी देओल, तृप्ती डिमरी यांनी प्रमुख भूमिका साकारल्या होत्या. या लवकरत आलिया-रणबीर ( Ranbir Kapoor And Alia Bhatt ) संजय लीला भन्साळी दिग्दर्शित ‘लव्ह अँड वॉर’ चित्रपटात झळकणार आहेत.
