रणबीर कपूर गेल्या काही काळापासून त्याच्या चित्रपट ‘तू झुठी मैं मक्कर’च्या प्रमोशनमध्ये व्यस्त होता, ज्यासाठी अभिनेत्याने मीडियाशी भरपूर संवाद साधला. चित्रपटही बॉक्स ऑफिसवर चांगलाच हीट ठरला. या चित्रपटाच्या प्रमोशनसाठी रणबीरने त्याची बहीण आणि प्रसिद्ध अभिनेत्री करीना कपूर खानच्या ‘व्हॉट वुमन वॉन्ट’ या टॉक शोमध्ये हजेरी लावली. या नव्या सीझनचा पहिला पाहुणा म्हणून रणबीरने हजेरी लावली.
या मुलाखतीमध्ये रणबीरने मनमोकळ्या गप्पा मारल्या. नुकताच या मुलाखतीमधील एक व्हिडिओ सोशल मीडियावर चांगलाच व्हायरल होत आहे. या टॉक शोमध्ये एका खेळादरम्यान रणबीर कपूरने मॉडेल आणि अभिनेत्री उर्फी जावेदवर टीका केली आहे. खरंतर या खेळात अभिनेत्रीचा चेहेरा नव्हे तर तिने परिधान केलेले कपडे पाहून ‘गुड टेस्ट’ किंवा ‘बॅड टेस्ट’ असं उत्तर देणं अपेक्षित असतं. याचदरम्यान उर्फीच्या एका फोटोवर रणबीरने टिप्पणी केली आहे.
आणखी वाचा : ‘हेरा फेरी ३’मधील ‘या’ गोष्टीवर चाहते नाराज; अक्षय कुमार कुमारला खुलं पत्र लिहीत व्यक्त केली खदखद
या फोटोपैकी एक फोटो उर्फीचा होता, आणि तो पाहताच रणबीरने ‘बॅड टेस्ट’ म्हणजेच ‘कपड्यांमधील किंवा फॅशनमधील वाईट निवड’ अशी टिप्पणी करत रणबीरने उत्तर दिलं आहे. याविषयी बोलताना पुढे रणबीर म्हणाला, “अशाप्रकारच्या फॅशनचा मी चाहता नाही, पण आज आपण अशा जगात वावरत आहोत जिथे एखाद्या व्यक्तीला जे योग्य वाटतं ते ती परिधान करू शकते.”
उर्फीने गेल्या काही दिवसांत बॉलिवूड सेलिब्रिटीजचं लक्ष वेधून घेतलं आहे. बऱ्याच बॉलिवूड सेलिब्रिटीजनी उर्फीच्या हिंमतीची दादही दिली आहे. अशातच रणबीर कपूरचं हे असं वक्तव्य पाहून उर्फीला कदाचित वाईट वाटू शकतं. रणबीरचा ‘तू झूठी मैं मक्कार’ या चित्रपटाने बॉक्स ऑफिसवर १०० कोटीचा टप्पा पार केला आहे. याबरोबरच रणबीरच्या आगामी ‘अॅनिमल’ या चित्रपटाची सगळेच आतुरतेने वाट बघत आहेत.
