अभिनेत्री दीपिका पदुकोण व रणवीर सिंह बॉलीवूडमधील लोकप्रिय कपल आहे. ऑनस्क्रीनबरोबरच ऑफस्क्रीन केमिस्ट्रीमुळे दोघे नेहमीच चर्चेत असतात. लवकरच आई-बाबा होणाऱ्या या कपलचा एक फोटो नुकताच व्हायरल झाला होता. अशातच रणवीरने दीपिका आणि त्याचे लग्नातले फोटो त्याच्या इन्स्टाग्राम अकाउंटवरून डिलीट केले आहेत.
मंगळवारी रणवीर सिंहने त्याच्या अधिकृत इन्स्टाग्राम अकाउंटवरून दीपिका आणि रणवीरचे जुने फोटो डिलीट केले किंवा लपवले आहेत, अशी चर्चा सुरू आहे. जानेवारी २०२३ पासूनचे त्यांचे सगळे जुने फोटो अभिनेत्याने डिलीट केले. यामध्ये या कपलच्या लग्नातले फोटोही गायब झाले आहेत. जरी २०१८ मधील त्यांच्या लग्नाचे फोटो इन्स्टाग्राम प्रोफाईलवर नसले, तरी अलीकडचे त्यांचे दिवाळी सेलिब्रेशनचे आणि लग्नाच्या वाढदिवसाचे फोटो त्याच्या इन्स्टाग्राम अकाउंटवर आहेत. अभिनेत्याच्या इन्स्टाग्राम अकाउंटवर एकूण १३३ पोस्ट्स आहेत.
हेही वाचा… गुड न्यूज दिल्यानंतर पहिल्यांदाच दिसला दीपिका पदुकोणचा बेबी बंप; अभिनेत्रीचा अनसीन फोटो व्हायरल
रणवीरच्या फोटो डिलीट करण्यामागे सोशल मीडिया स्ट्रॅटेजी असण्याची दाट शक्यता आहे. या जोडप्यासाठी हे नवीन नाही, कारण यापूर्वीदेखील दीपिका पदुकोणने असंच काहीतरी केलं होतं. अभिनेत्रीने तिच्या सगळ्या पोस्ट डिलीट केल्या होत्या. ३१ डिसेंबर २०२० रोजी तिने तिच्या इन्स्टाग्राम प्रोफाइलवरील एकूण एक पोस्ट डिलीट केली होती आणि एका ऑडिओ क्लिपद्वारे नवी सुरुवात केली होती.
रणवीरने डिलीट केलेले फोटोज दीपिकाच्या प्रोफाईलवर आधी दिसत नव्हते, परंतु नंतर बाकीचे फोटो सोडून केवळ लग्नाचे फोटो दिसले.
नुकतेच दीपिकाच्या बेबी बंपचे फोटोज सोशल मीडियावर व्हायरल झाले होते. या फोटोजमध्ये रणवीर आणि दीपिका एका जहाजातून उतरताना दिसत होते. दीपिकाने या फोटोमध्ये लूज टीशर्ट ड्रेस आणि निळ्या रंगाची जिन्स परिधान केली होती, तर रणवीर सिंगने ऑल व्हाईट लूकची निवड केली होती. या फोटोमध्ये दीपिकाचं बेबी बंप दिसतंय असं चाहते म्हणत होते. रणवीर आणि दीपिकाचा हा अनसीन फोटो रेडीटवर व्हायरल झाला होता.
लग्नाच्या सहा वर्षांनंतर दीपिका आणि रणवीर आई-बाबा होणार आहेत. २९ फेब्रुवारीला याबाबत दीपिका-रणवीरने चाहत्यांना ‘गुड न्यूज’ दिली होती. या कपलने सोशल मीडियावर एक खास पोस्ट शेअर केली होती. या पोस्टमध्ये ‘सप्टेंबर २०२४’ असे लिहिले होते आणि त्याच्या खाली तिचे व रणवीरचे नाव लिहिले होते. तसेच या पोस्टमध्ये लहान बाळाचे कपडे व खेळण्यांचे चित्रही रेखाटले होते.
दरम्यान, दीपिका पदुकोणच्या कामाबद्दल सांगायचं झालं, तर दीपिका नुकतीच ‘फायटर’मध्ये झळकली होती. ‘सिंघम अगेन’ या आगामी चित्रपटातदेखील दीपिका दिसणार आहे, तर रणवीर सिंह ‘डॉन-३’ या चित्रपटात कियारा अडवाणीबरोबर झळकणार आहे.
