मुंबईचं सिद्धिविनायक हे देवस्थान आणि सेलिब्रिटी यांचं नातं हे साऱ्या जगाला ठाऊक आहे. मनोरंजन सृष्टीतील कित्येक सेलिब्रिटी इथे येऊन नतमस्तक होतात. कित्येक चित्रपटाचा मुहूर्त इथेच होतो. नुकतंच कन्नड चित्रपट ‘कांतारा’चा दिग्दर्शक अभिनेता रिषभ शेट्टी यानेही सिद्धिविनायक मंदिरात हजेरी लावली होती.
बॉलिवूडचे महानायक अमिताभ बच्चन हेसुद्धा सिद्धीविनायकाचे भक्त आहेत. बच्चन यांना जेव्हा गंभीर अपघात झाला होता तेव्हासुद्धा कित्येकांनी सिद्धीविनायकाला साकडं घातलं होतं, तेव्हापासून अमिताभ बच्चन आणि त्यांचे कुटुंबीय कोणत्याही शुभकार्याची सुरुवात सिद्धीविनायकाचे दर्शन घेऊन करतात. नुकतंच अमिताभ बच्चन यांनी अभिषेक बच्चनबरोबर सिद्धीविनायकाचं दर्शन घेतलं आहे.
आणखी वाचा : “इतकाही कंजूसपणा…” अभिनेत्री शिल्पा तुळसकरची निर्मात्यांवर टीका
‘उंचाई’ हा बिग बी यांचा चित्रपट नुकताच प्रदर्शित झाला आहे. त्यासाठी आशीर्वाद घ्यायला बिग बी अभिषेकबरोबर सिद्धिविनायकाच्या दर्शनासाठी आले होते. सकाळी सकाळी बिग बी आणि ज्युनिअर बच्चन यांनी बाप्पाचे दर्शन घेतले आणि मनोभावे प्रार्थनादेखील केली. बच्चन हे बाप्पापुढे नतमस्तक झाले आणि त्यांनी हात जोडून प्रार्थनादेखील केली.
‘उंचाई’ या चित्रपटाचे तिकीट दरही कमी केली असल्याची बातमी नुकतीच समोर आली आहे. या चित्रपटात अमिताभ यांच्याबरोबर अनुपम खेर, डॅनी, बोमन इराणी, नीना गुप्ता, सारिका, परिणीती चोप्रा ही कलाकार मंडळी महत्त्वाच्या भूमिकेत पाहायला मिळणार आहेत.
