सहारा इंडिया समूहाचे प्रमुख सुब्रतो रॉय यांचे मंगळवारी निधन झाले. मुंबईत त्यांनी अखेरचा श्वास घेतला. ते ७५ वर्षांचे होते. सहारा कुटुंबाचे प्रमुख सुब्रतो रॉय दीर्घकाळापासून गंभीर आजाराने त्रस्त होते. त्यांच्यावर मुंबईतील खासगी रुग्णालयात उपचार सुरू होते. प्रकृती अस्वास्थ्यामुळे त्यांना रविवारी कोकिलाबेन धीरूभाई अंबानी रुग्णालयात दाखल करण्यात आले होते. अनेक वर्षांपासून लोकांचे पैसे न दिल्याने सहारा इंडियाविरुद्ध पाटणा उच्च न्यायालयात खटला सुरू आहे. लोकांनी हे पैसे कंपनीच्या अनेक योजनांमध्ये गुंतवले होते.
मात्र नंतर याप्रकरणी सर्वोच्च न्यायालयाकडून सहाराश्रींना मोठा दिलासा मिळाला. गेल्या वर्षी सर्वोच्च न्यायालयाने पाटणा उच्च न्यायालयाच्या अटकेच्या आदेशावर तात्काळ सुनावणी करून स्थगिती दिली होती. तसेच त्यांच्यावर पुढील कारवाईबाबत स्थिती कायम ठेवण्याचे आदेश देण्यात आले. सुब्रतो रॉय यांच्यावरही असाच एक खटला सर्वोच्च न्यायालयात सुरू आहे. ते सध्या जामिनावर बाहेर होते. केवळ उद्योगविश्वातच नव्हे तर चित्रपटसृष्टीतील कित्येक बड्या सेलिब्रिटीजबरोबर सहाराश्री यांचे सलोख्याचे संबंध होते.
असं सांगितलं जातं की सुब्रतो रॉय आणि बॉलिवूडचे महानायक यांचे फार चांगले संबंध होते, इतकंच नव्हे तर बिग बी यांना त्यांच्या पडत्या काळात सुब्रतो रॉय यांनी मदतही केल्याचं सांगितलं जातं. राजकीय नेते अमर सिंह यांनी बिग बी आणि सहाराश्री यांची भेट घडवून आणल्याचं सांगितलं जातं आणि त्यानंतरच त्यांच्यात मैत्री झाली. मीडिया रीपोर्टनुसार जेव्हा अमिताभ आर्थिक अडचणीत होते तेव्हा धीरूभाई अंबानी यांच्याबरोबरच सुब्रतो रॉय यांनीही मदतीचा हात पुढे केला होता.
१९९० ते २००० यादरम्यान चित्रपट फ्लॉप होणे आणि दिवाळखोरी अशा वेगवेगळ्या संकटांचा सामना करत असताना बिग बी यांना बऱ्याच नेत्यांनी आणि उद्योगपतींनी मदतीचा हात पुढे केला होता. १९७८ मध्ये व्यवसाय सुरू करत सुब्रतो रॉय यांनी ‘सहारा इंडिया’चा प्रवास सुरू केला. २०१२ मध्ये इंडिया टूडेच्या रीपोर्टनुसार सुब्रतो रॉय यांचे नाव भारतातील सर्वात १० श्रीमंत लोकांमध्ये घेतले गेले होते. सुब्रतो रॉय यांच्या निधनामुळे विविध क्षेत्रातील लोकांनी हळहळ व्यक्त केली आहे.
