Saif Ali Khan Attack News Saba Pataudi Shares health updates : सैफ अली खानवर वांद्रे ( पश्चिम ) येथील राहत्या घरी दरोडेखोराने चाकूहल्ला केल्याची घटना घडली आहे. गुरुवारी मध्यरात्री अभिनेत्याच्या घरी दरोडेखोर शिरला होता. यावेळी आपल्या कुटुंबीयांच्या संरक्षणासाठी सैफने चोराचा सामना केला. यावेळी अभिनेत्याकडे स्वत:चा बचाव करण्यासाठी काहीच नव्हतं. मध्यरात्री २.३० च्या सुमाराच या चोराने सैफवर चाकूने वार केल्याची घटना घडली.
लीलावती रुग्णालयाचे सीईओ डॉ. निरज उत्तमानी यांनी दिलेल्या माहितीनुसार, पहाटे ३.३० च्या सुमारास इब्राहिम अली खान आणि सैफच्या घरचे कर्मचारी त्याला रुग्णालयात घेऊन आले. यानंतर डॉक्टरांच्या टीमकडून अभिनेत्यावर उपचार करण्यास सुरुवात झाली. या हल्ल्यानंतर मनोरंजन विश्वातील सैफची मित्रमंडळी व चाहते चिंतेत पडले होते. यामुळे सैफ-करीनाच्या टीमने अभिनेत्यावर उपचार सुरू असून, याप्रकरणी मीडिया व चाहत्यांनी संयम बाळगावा, घरातील इतर सदस्य सुरक्षित आहेत. अशी माहिती गुरुवारी सकाळी दिली होती. आता अभिनेत्यावरची शस्त्रक्रिया पार पडली असून सैफबद्दलची हेल्थ अपडेट त्याची मोठी बहीण सबा पतौडी हिने इन्स्टाग्रामवर पोस्ट शेअर करत दिली आहे.
“सैफ अली खानवर लीलावती रुग्णालयात शस्त्रक्रिया पार पडली असून त्याच्या जीवाला आता कोणताही धोका नाहीये. सध्या त्याच्यावर पुढील उपचार सुरू असून डॉक्टर त्याच्या प्रकृतीवर लक्ष ठेवून आहेत. कुटुंबातले सगळे सदस्य पूर्णपणे सुरक्षित आहेत आणि पोलीस या घटनेचा पुढील तपास करत आहेत. आम्ही डॉ. निरज उत्तमानी, डॉ. नितीन डांगे, लीना जैन आणि लीलावती रुग्णालयातील संपूर्ण टीमचे आभार मानू इच्छितो. चाहत्यांनी व हितचिंतकांनी केलेल्या प्रार्थनेबद्दल खूप खूप आभार…” असं सबाने आपल्या पोस्टमध्ये म्हटलं आहे.
दरम्यान, शस्त्रक्रिया पार पडल्यावर सैफ अली खानची भेट घेण्यासाठी सारा अली खान, इब्राहिम अली खान, पत्नी करीना कपूर असे सगळेजण लीलावती रुग्णालयात पोहोचले आहेत.
