बॉलीवूडचे कलाकार हे सातत्याने चर्चेत असतात. कधी त्यांच्या सोशल मीडियावरील पोस्ट, कधी चित्रपटांतील भूमिका, तर कधी त्यांनी केलेली वक्तव्ये यांमुळे हे कलाकार चर्चांचा भाग बनतात. आता अभिनेता सैफ अली खानने एका मुलाखतीत त्याच्या मुलांबद्दल वक्तव्य केल्याने सध्या तो चर्चेत आहे. त्याला सारा, इब्राहिम, तैमूर व जेह अशी चार मुले आहेत.
काय म्हणाला सैफ अली खान?
अभिनेता सैफ अली खानने नुकतीच ‘इंडिया टुडे’ला मुलाखत दिली. या मुलाखतीत त्याने आपल्या मुलांबद्दल बोलताना म्हटले, “मला प्रत्येकाबरोबर वेळ घालवायला आवडते. मी अभिनय क्षेत्रात आहे. म्हणून त्यांनीदेखील याच क्षेत्रात काम करावे, असा कोणत्याही प्रकारचा त्यांच्यावर दबाव नाही. सारा आणि इब्राहिमने तर हे केलेच आहे. मला वाटते की, अभिनय क्षेत्रात काम करणे उत्तम आहे. तरी मी त्यांच्यावर तसा कोणत्याही प्रकारचा दबाव निर्माण करीत नाही.”
सैफ अली खान पुढे बोलताना म्हणतो, “माझी दोन मोठी मुले आधीपासूनच अभिनय क्षेत्रात काम करीत आहेत किंवा करतील. तैमूरने मला एकदा सांगितले होते की, लोकांसमोर पाठ केलेल्या ओळी बोलून दाखवण्याचा विचार मला सहन होत नाही. त्यावर मी त्याला म्हटलं, मी पूर्णत: समजू शकतो. आता तो मला सांगतो की, तो शाळेत सादर होणाऱ्या नाटकांची वाट पाहत आहे. जो लहान मुलगा आहे, तो जेह जन्मत: कलाकार आहे. तुम्ही ते बघू शकता आणि मला माहीत आहे की, ते त्याच्याकडे कुठून आलं आहे. त्यामुळे त्यांच्यावर कोणताही दबाव नाही. जर ते आनंदी राहणार असतील, तर ते शाळेतील शिक्षकदेखील होऊ शकतात.”
सैफ अली खानने मुलांना सल्ला देण्याविषयी बोलताना म्हटले, “मी मुलांवर आयुष्यात एक विशिष्ट प्रकारचा दबाव टाकू इच्छित नाही.” त्याची मुले त्याच्याकडे सल्ल्यासाठी येतात का, असे विचारले असता सैफ म्हणाला, “मी सध्या चित्रपटाचे शूटिंग करीत नाही. त्यामुळे मी माझा बहुतांश वेळ माझ्या मुलांसोबत घालवतो. महत्त्वाचे म्हणजे ते मला सल्ला विचारण्यासाठी येतात. मी भाग्यवान आहे की, त्यांना माझे मत जाणून घ्यायचे असते. माझ्यासाठी माझ्या मुलांबरोबर वेळ घालवणे महत्त्वाचे आहे.”
सैफची मुलगी सारा अली खानने २०१८ मध्ये केदारनाथ या चित्रपटातून पदार्पण केले. तर, करण जोहर निर्मित आणि काजोलची मुख्य भूमिका असलेल्या चित्रपटात इब्राहिम दिसणार असल्याचे म्हटले जात आहे. तो खुशी कपूरबरोबरही दिसणार आहे.
दरम्यान, सारा आणि इब्राहिम हे अमृता सिंग आणि सैफ अली खान यांची मुले आहेत. सैफ अली खानने अमृता सिंगबरोबर १९९१ साली पहिले लग्न केले होते. २००४ मध्ये त्यांचा घटस्फोट झाला. करीना कपूर व सैफ अली खान यांनी २०१२ साली लग्न केले आणि त्यांना तैमूर व जेह ही दोन मुले आहेत. हे संपूर्ण कुटुंब अनेकदा आपले फोटो सोशल मीडियावर पोस्ट करीत असल्याचे पाहायला मिळते.
