अभिनेता अरबाज खानच्या लग्नाची गेल्या काही दिवसांपासून चर्चा होती. अखेर अरबाज (२४ डिसेंबर रोजी) लग्नबंधनात अडकला. त्याने ५६ व्या वर्षी दुसऱ्यांदा लग्नगाठ बांधली आहे. त्याच्या दुसऱ्या लग्नाचे फोटो समोर आले आहेत. अरबाजच्या पत्नीचे नाव शुरा खान असून त्यांचा विवाहसोहळा अर्पिता खानच्या घरी पार पडला.
अरबाज खानच्या लग्नाला रवीना टंडनने लेक राशा थडानीबरोबर हजेरी लावली. तर, रितेश देशमुख व जिनिलीया देशमुख दोन्ही मुलांसह या लग्नसोहळ्याला उपस्थित होते. अरबाजचा मुलगा अरहान देखील या लग्नात हजर होता. इतकंच नव्हे तर खुद्द भाईजान सलमान खानचा सुद्धा आपल्या भावाच्या दुसऱ्या लग्नात थीरकतानाचा व्हिडीओ व्हायरल झाला होता. गेले काही दिवस सोशल मीडियावर याच गोष्टीची चर्चा आहे.
आणखी वाचा : ऑस्कर विजेत्या ‘पॅरासाइट’ फेम अभिनेत्याचा संशयास्पद मृत्यू; स्वतःच्याच कारमध्ये आढळला मृतदेह
बऱ्याच लोकांनी या लग्नानंतर अरबाजची पहिली पत्नी व अभिनेत्री मलायका अरोराला ट्रोल केलं तर कित्येकांनी अरबाजवर टीका केली आहे. नुकतंच अरबाजचे वडील आणि प्रसिद्ध लेखक सलीम खान यांनी या गोष्टीवर भाष्य केलं आहे. ‘न्यूज १८ शोशा’शी संवाद साधताना सलीम खान म्हणाले, “लग्न करण्याचा निर्णय हा सर्वस्वी त्यांचा आहे, अन् माझ्यामते तरी हा काही गुन्हा नाही. मला वाटत नाही यासाठी त्यांनी चर्चा करायला हवी होती. तो तरुण आहे, सुशिक्षित आहे, समजूतदार आहे व स्वतःचे निर्णय घेण्यास समर्थ आहे. त्यामुळे माझ्या परवानगीची काहीच आवश्यकता नाही. जर तो खुश असेल तर मला आणखी काहीच नको.”
अरबाजने इन्स्टाग्रामवर लग्नाचे फोटो शेअर केले जे चांगलेच व्हायरल झाले आहेत. अरबाज खानच्या या पोस्टवर सिनेसृष्टीतील कलाकार व चाहते कमेंट्स करून शुभेच्छा देत आहेत. या पोस्टवर चाहते लाइक्स व कमेंट्सचा वर्षाव करत आहेत. दरम्यान, अरबाज खानचे पहिले लग्न मलायका अरोराशी झाले होते. त्यांनी सहा वर्षांपूर्वी घटस्फोट घेतला. १९ वर्षांच्या संसारानंतर ते विभक्त झाले होते. त्यांना अरहान नावाचा मुलगा आहे.
