बॉलिवूडचा भाईजान सलमान खान हा सध्या चांगलाच चर्चेत आहे. शाहरुख खानच्या ‘पठाण’मध्ये सलमानने त्याच्या चाहत्यांना दर्शन दिलं आणि या दोघांना एकत्र पाहायची कित्येकांची इच्छा पूर्ण झाली. याबरोबरच सलमानच्या आगामी चित्रपटांची त्याच्या चाहत्यांना उत्सुकता आहे. त्यापैकी ‘किसी का भाई किसी की जान’ या चित्रपटातील एक गाणं नुकतंच प्रदर्शित झालं आहे.
या चित्रपटाचा टीझर ‘पठाण’बरोबरच सादर करण्यात आला होता, आता यातील हे नवं पहिलं गाणं ‘व्हॅलेंटाईन्स डे’च्या निमित्ताने प्रदर्शित करण्यात आलं आहे. ‘नैयो लगदा’ हे एक रोमॅंटिक गाणं आहे आणि हे गाणं सलमान खान आणि पूजा हेगडेवर चित्रित झालं आहे. हे गाणं खूप उत्तमरित्या चित्रित केल्याचं स्पष्ट होत असलं तरी यातील एका स्टेपमुळे नेटकरी सलमानला चांगलेच ट्रोल करत आहेत.
आणखी वाचा : तन्मय भट्टचं ‘चाइल्ड पॉर्न’ संबंधीत जुनं ट्वीट चर्चेत; कंगना रणौतने केली जोरदार टीका, नेमकं प्रकरण काय?
सलमान खानच्या प्रत्येक गाण्यात एक त्याची खास अशी स्टेप आपल्याला बघायला मिळते. या गाण्यातीलही सलमानची एक स्टेप चांगलीच व्हायरल होत आहे. नेटकऱ्यांच्या मते सलमान डान्स करत नसून व्यायाम करतो आहे हे या स्टेपवरून आपल्या लक्षात येत आहे. सोशल मीडियावर सलमानला प्रचंड ट्रोलही केलं जात आहे. वेगवेगळे मीम्सदेखील प्रचंड व्हायरल होत आहेत.
सलमानच्या चित्रपटातील हे नवं गाणं नेटकऱ्यांना प्रचंड आवडलं आहे. हे गाणं ९० च्या दशकातील गाण्यांची आठवण करून देणारं आहे असं नेटकऱ्यांनी कॉमेंटमध्ये लिहिलं आहे, पण सलमानच्या हुक स्टेपची या मीम्समुळे चांगलीच चर्चा सुरू आहे. या गाण्याला आत्तापर्यंत १२ मिलियन लोकांनी पाहिलं आहे. ‘किसी का भाई किसी की जान’ हा चित्रपट २१ एप्रिल २०२३ रोजी झळकणार आहे. त्याचे चाहते त्याच्या या चित्रपटाची आतुरतेने वाट बघत आहेत.
