बॉलिवूडचा भाईजान सलमान खानच्या ‘किसी का भाई किसी की जान’ चित्रपटाबाबत त्याच्या चाहत्यांमध्ये प्रचंड उत्सुकता आहे. या चित्रपटाचा टीझर जानेवारी महिन्यात ‘पठाण’बरोबर प्रदर्शित झाला होता. टीझरनंतर चित्रपटातील गाण्यांनाही प्रेक्षकांची पसंती मिळाली होती. याच्या ट्रेलरची सगळेच आतुरतेने वाट पहात होते. अखेर ‘किसी का भाई किसी की जान’ चित्रपटाचा ट्रेलर प्रदर्शित करण्यात आला आहे.
चित्रपटाच्या ट्रेलरमध्ये सलमान खानच्या अँक्शन सीन्सचा थरार पाहायला मिळत आहे. सलमान खान व पूजा हेगडेच्या केमिस्ट्रीची झलक ट्रेलरमध्ये पाहायला मिळत आहे. याबरोबरच भाईजानचा रोमँटिक अंदाजही पाहायला मिळत आहे. या चित्रपटात सलमान खान दाक्षिणात्य लूकमध्ये दिसत आहे. सलमान खानचा हा चित्रपट सुपरस्टार अजित कुमारच्या २०१४ च्या ‘वीरम’ या तमिळ चित्रपटाचा रिमेक आहे. पण तुम्हाला माहितीये का की ‘दृश्यम’प्रमाणेच ‘वीरम’चेही इतर दाक्षिणात्य भाषांमध्ये आधीच रिमेक झाले आहेत.
आणखी वाचा : “रणबीर कपूर गेला खड्ड्यात” अभिनेत्याबद्दल केलेल्या या वक्तव्यावर उर्फी जावेदचे स्पष्टीकरण; म्हणाली “मी असं…”
‘किसी का भाई किसी की जान’ हा ‘वीरम’ या चित्रपटाचा तिसरा अधिकृत रिमेक आहे. याआधी २०१७ मध्ये सुपरस्टार पवन कल्याण यांनी तेलुगूमध्ये ‘कटमर्यादू’ हा चित्रपट काढला जो ‘वीरम’चा रिमेक आहे. यानंतर २०१९ मध्ये ‘ओडेया’ हा कन्नड चित्रपट प्रेक्षकांच्या भेटीला आला जोसुद्धा अजित कुमारच्या चित्रपटाचा रिमेक आहे. आता सलमान खान हिंदीमध्ये याचा रिमेक ‘किसी का भाई किसी की जान’ या नावाने घेऊन येत आहे.
‘वीरम’चे तेलुगू आणि कन्नड रिमेक हे यूट्यूबवर उपलब्ध आहेत. ‘किसी का भाई किसी की जान’ चित्रपटात सलमान खानसह दग्गुबती व्यंकटेश, पूजा हेगडे, सिद्धार्थ निगम, राघव जुयाल हे महत्त्वाच्या भूमिकेत आहेत. या चित्रपटात दाक्षिणात्य अभिनेता जगपती बाबू नकारात्मक भूमिका साकारताना दिसणार आहे. सलमान खानच्या चित्रपटाचे दिग्दर्शन फरहाद सामजी करत आहेत. तर सलमान खान हा स्वत: या चित्रपटाची निर्मिती करत आहे. ईदच्या मुहुर्तावर येत्या २१ एप्रिलला ‘किसी का भाई किसी की जान’ चित्रपट सर्वत्र प्रदर्शित होणार आहे.
