बॉलीवूड अभिनेता सलमान खान आणि कतरिना कैफचा ‘टायगर ३’ सध्या चांगलाच चर्चेत आहे. काही दिवसांपूर्वीच या चित्रपटाचा धमाकेदार ट्रेलर प्रदर्शित करण्यात आला. या ट्रेलरला प्रेक्षकांचा जबरदस्त प्रतिसाद मिळाला होता. ‘टायगर ३’मध्ये प्रेक्षकांना सलमानबरोबर कतरिनाचाही अ‍ॅक्शन लूक पाहायला मिळणार आहे. आता चित्रपटाच्या पहिल्या शोबद्दल मोठी माहिती समोर आली आहे.
हेही वाचा- Video: भीषण कार अपघातानंतर पहिल्यांदाच गायत्री जोशी आली समोर; पतीसह एका कार्यक्रमात झाली होती सहभागी
सेलिब्रिटी फोटोग्राफर तरण आदर्श यांनी सोशल मीडियावर चित्रपटाचा पहिला शो आणि अॅडव्हान्स बुकिंगबद्दल एक पोस्ट शेअर केली आहे. ‘टायगर ३’चा पहिला शो सकाळी ७ वाजता प्रदर्शित होणार आहे. काही दिवसांपूर्वीच या चित्रपटाच्या ॲडव्हान्स बुकिंगची तारीख जाहीर करण्यात आली होती. ५ नोव्हेंबर २०२३ पासून ‘टायगर ३’चे ॲडव्हान्स बुकिंग सुरू होणार आहे.
आंतरराष्ट्रीय बाजारपेठेत ‘टायगर ३’चे अॅडव्हान्स बुकिंग सुरू झाले आहे. UK, UAE व USA मध्ये ‘टायगर ३’च्या अॅडव्हान्स बुकिंगला चांगला प्रतिसाद मिळाला आहे. निर्माते ११ नोव्हेंबरला यूएसए आणि कॅनडामध्ये ‘टायगर ३’ प्रदर्शित करण्याचा विचार करीत असल्याची माहिती मिळाली आहे.
‘टायगर ३’ हा ‘यशराज फिल्म्स’च्या ‘स्पाय युनिव्हर्स’मधला पाचवा चित्रपट आहे. या चित्रपटात सलमान, कतरिनाबरोबर इमरान हाश्मीही मुख्य भूमिकेत दिसणार आहे. इमरानने या चित्रपटात नकारात्मक भूमिका साकारली आहे. मनीष शर्मा दिग्दर्शित हा चित्रपट १० नोव्हेंबर २०२३ ला प्रदर्शित होणार असून, तो हिंदीबरोबर तमीळ व तेलुगु भाषेतही प्रदर्शित होणार आहे.
