बॉलिवूड अभिनेता सलमान खानला गेल्या काही दिवसांपासून सातत्याने जीवे मारण्याची धमकी मिळत आहे. काही दिवसांपूर्वी त्याला वाय प्लस सुरक्षादेखील प्रदान करण्यात आली आहे. त्यानंतर आता सलमान खानने त्याच्या सुरक्षेसाठी एक महागडी बुलेटप्रूफ कार खरेदी केली होती. या कारच्या किंमतीनंतर आता त्या गाडीच्या नंबर प्लेटचीही चर्चा होताना पाहायला मिळत आहे.
सलमान खानने बुलेटप्रूफ निसान पेट्रोल एसयूव्ही परदेशातून आयात केली आहे. ही एक हाय एंड बुलेट-प्रूफ एसयूव्ही कार आहे. ही कार अद्याप भारतात लाँच करण्यात आलेली नाही. या कारमध्ये B6 किंवा B7 लेव्हलपर्यंतची सुरक्षा प्रदान करण्यात आली आहे. ही कार जागतिक स्तरावरील सुरक्षित कार्सपैकी एक आहे. बी ६ लेव्हलपर्यंतची सुरक्षा प्रदान करणाऱ्या कार्स रायफलद्वारे झाडलेल्या गोळ्यांचा देखील सामना करू शकतात.
आणखी वाचा : Video : सलमान खान भर कार्यक्रमात झाला शर्टलेस, म्हणाला “माझे सिक्स पॅक्स अ‍ॅब्स VFX द्वारे…”
या कारने आता सलमान खानच्या टोयोटा लँड क्रूझर एलसी २०० या कारची जागा घेतली आहे. या कारमध्ये सलमानने बुलेटप्रूफ काच लावून घेतली होती. सलमान खानच्या नव्या एसयूव्ही कारची नंबर प्लेट फारच खास आहे. या कारसाठी सलमान खानने २ ते ३ कोटी रुपये खर्च केले आहेत. त्याच्या या गाडीचा नंबर २७२७ असा आहे.
या नंबरच्या मागे एक खास कारण आहे. सलमान खानचा जन्म २७ डिसेंबर १९६५ रोजी झाला होता. तो त्याचा लकी नंबर असल्याचे म्हटले जाते. त्यामुळे त्याने त्याच्या नव्या गाडीला त्याचा लकी नंबर घेतला आहे.
दरम्यान ‘किसी का भाई किसी की जान’ चित्रपटाच्या ट्रेलरमध्ये सलमान खानसह दग्गुबती व्यंकटेश, पूजा हेगडे, सिद्धार्थ निगम, राघव जुयाल यांचीही झलक पाहायला मिळाली. या चित्रपटात दाक्षिणात्य अभिनेता जगपती बाबू नकारात्मक भूमिका साकारताना दिसणार आहे. शहनाज गिल, जस्सी गिल आणि पलक तिवारी यांच्याही चित्रपटात प्रमुख भूमिका आहेत. ईदच्या मुहुर्तावर येत्या २१ एप्रिलला हा चित्रपट सर्वत्र प्रदर्शित होणार आहे.
