सलमान खान व कतरिना कैफ यांचा ‘टायगर ३’ हा चित्रपट १२ नोव्हेंबर रोजी सिनेमागृहांमध्ये प्रदर्शित झाला. हा चित्रपट पाहण्यासाठी प्रेक्षकांनी गर्दी केल्याचं पाहायला मिळालं. इतकंच नाही तर काही ठिकाणी तर चाहत्यांनी सलमानचा चित्रपट स्क्रिनवर चालू असताना थिएटर्समध्येच फटाके फोडले. या संपूर्ण प्रकारावर सलमान खाननेही प्रतिक्रिया दिली आहे.
‘टायगर ३’ ची दणक्यात सुरुवात, सलमान-कतरिनाच्या चित्रपटाने पहिल्याच दिवशी कमावले ‘तब्बल इतके कोटी
नेमकं काय घडलं?
सोशल मीडियावर व्हायरल होणाऱ्या व्हिडीओमध्ये सलमानचे चाहते चित्रपटगृहात फटाके फोडताना दिसत आहेत. टायगरच्या एन्ट्रीचा सीन येतो आणि चित्रपटगृहात प्रेक्षक फटाके फोडतात. त्यानंतर पूर्ण चित्रपटगृहात फटाक्यांचा धूर होतो. यावेळी काही प्रेक्षक तिथून बाहेर पडताना दिसतात. हा व्हिडीओ नाशिक येथील मालेगावचा आहे, असं म्हटल जातंय.
सलमान खानची प्रतिक्रिया
“‘टायगर ३’ चित्रपट चालू असताना थिएटरमध्ये फटाके फोडले गेले, असं मी ऐकत आहे. हे धोकादायक आहे. स्वतःचा आणि इतरांचा जीव धोक्यात न घालता चित्रपटाचा आनंद घ्या. सुरक्षित राहा,” असं सलमान खानने त्याच्या एक्स पोस्टमध्ये म्हटलं आहे.
दरम्यान, ‘टायगर ३’ने पहिल्याच दिवशी जगभरात तब्बल ९४ कोटी रुपयांचा गल्ला जमवला. भारतात चित्रपटाने ५२ कोटींहून अधिक कमाई केली आहे. सलमान खानच्या या चित्रपटाला प्रेक्षकांचा जबरदस्त प्रतिसाद मिळत आहे. हा सलमानचा सर्वाधिक ओपनिंग करणारा चित्रपट ठरला आहे.
